ప్రపంచ టెస్ట్ ఛాంపియన్‌షిప్ (WTC) 2025–27 సీజన్‌కు భారత్ గట్టి స్టార్ట్ ఇచ్చింది. ఇంగ్లండ్‌తో జరిగిన చివరి టెస్ట్ మ్యాచ్‌లో కేవలం 6 పరుగుల తేడాతో గెలిచి, పాయింట్ల పట్టికలో మూడో స్థానానికి చేరుకుంది. ఓవల్ వేదికగా జరిగిన ఈ మ్యాచ్ పూర్తిగా ఉత్కంఠభరితంగా సాగింది.ఆఖరి రోజుకు ఆట మొదలయ్యే సరికి ఇంగ్లండ్‌ విజయం ఖాయమని అంతా భావించారు. వాళ్లకు అవసరమైన పరుగులు కేవలం 35 మాత్రమే. చేతిలో ఇంకా నాలుగు వికెట్లు ఉండటంతో మ్యాచ్ దిశ వారి వైపే పోతుందనిపించింది. కానీ భారత బౌలర్లు అంచనాలను తలకిందులుగా మార్చేశారు.హైదరాబాద్‌కు చెందిన పేసర్ మహ్మద్ సిరాజ్ పంజా విసిరాడు. ఐదు కీలక వికెట్లు తీసి ఇంగ్లండ్‌ను దెబ్బతీశాడు. ఒక్కో బంతిని సిరాజ్ అద్భుతంగా వాడుతూ విజయం భారత్‌కు తెచ్చిపెట్టాడు. ఇది పరుగుల పరంగా భారత్‌కు లభించిన అత్యల్ప తేడా గల గెలుపులలో ఒకటి.

పాయింట్ల పట్టికలో భారత్ మూడో స్థానంలో
ఈ గెలుపుతో టీమిండియా డబ్ల్యూటీసీ పాయింట్ల పట్టికలో పైకి దూసుకెళ్లింది. ఐదు టెస్టుల తర్వాత భారత్ 28 పాయింట్లతో 46.67 శాతం పీసీటీ సాధించింది. దీంతో మూడో స్థానాన్ని తన ఖాతాలో వేసుకుంది.ఇంగ్లండ్ జట్టు మాత్రం ఈ ఓటమితో నాలుగో స్థానానికి జారిపోయింది. వారి ఖాతాలో ప్రస్తుతం 26 పాయింట్లు ఉన్నాయి. పీసీటీ 43.33గా ఉండటంతో స్థానాన్ని నిలబెట్టుకోలేకపోయింది. పైగా స్లో ఓవర్ రేట్ వల్ల రెండు పాయింట్లు కోల్పోవడం మరింత ఇబ్బందికరంగా మారింది.

ప్రస్తుతం డబ్ల్యూటీసీ పట్టిక పై ఆస్ట్రేలియా అగ్రస్థానంలో కొనసాగుతోంది. వెస్టిండీస్‌పై 3-0 సిరీస్‌ను క్లీన్‌స్వీప్ చేసిన ఆ జట్టు, 36 పాయింట్లు సాధించింది. 100 శాతం పీసీటీతో టాప్‌లో నిలిచింది.ఇదే సమయంలో శ్రీలంక బంగ్లాదేశ్‌పై సిరీస్ గెలిచి రెండో స్థానాన్ని ఆక్రమించింది. వారి ఖాతాలో 16 పాయింట్లు ఉండగా, పీసీటీ 66.67 శాతం ఉంది. ఈ ఫలితాలతో శ్రీలంక టీం కూడా పోటీలో నిలిచింది.

డబ్ల్యూటీసీ 2025-27 సీజన్‌లో పాకిస్థాన్, న్యూజిలాండ్ ఇంకా తమ తొలి మ్యాచ్ ఆడలేదు. అలాగే డిఫెండింగ్ చాంపియన్ దక్షిణాఫ్రికా ఇప్పటివరకు పోటీలో అడుగుపెట్టలేదు. వచ్చే నెలలలో ఈ జట్లు తమ ప్రస్థానాన్ని ప్రారంభించనున్నాయి.సీనియర్ ఆటగాళ్లు లేకుండానే యువ భారత జట్టు అద్భుతంగా ఆడింది. ఇదే వారి నిజమైన శక్తిని చాటిచెప్పే గెలుపు. టెస్ట్ ఛాంపియన్‌షిప్‌లో ముందుకు సాగేందుకు ఇది బలమైన మెరుగైన ఆరంభం.