దమ్మామ్: సౌదీ అరేబియాలో అమలవుతున్న ట్రాఫిక్ సంస్కరణలు ఫలితాలను ఇస్తున్నాయి. రోడ్ యాక్సిడెంట్స్ తగ్గడంతోపాటు ప్రమాదంలో మరణించే వారి సంఖ్యలో భారీ తగ్గుదల నమోదైంది. తూర్పు ప్రావిన్స్‌లో ట్రాఫిక్ మరణాలు లక్ష మందికి 72శాతం తగ్గాయని, గాయపడ్డ వారి సంఖ్య 76శాతం తగ్గాయని ట్రాఫిక్ భద్రతా కమిటీ వెల్లడించింది.  అదేసమయంలో ప్రమాద సంబంధిత ఖర్చులలో SR10 బిలియన్లకు పైగా ($2.6 బిలియన్లు) ఆదా అయ్యాయని పేర్కొంది. ఈ మేరకు తూర్పు ప్రావిన్స్ ఎమిర్ ప్రిన్స్ సౌద్ బిన్ నైఫ్ వివరాలను విడుదల చేశారు.  రోడ్డు భద్రతకు సంబంధించిన సంస్కరణలను అమలు చేయడం కారణంగానే మెరుగైన ఫలితాలు ఇస్తున్నాయని ప్రిన్స్ సౌద్ తెలిపారు. 

డ్రైవర్లకు అవగాహన కల్పించడంతోపాటు ట్రాఫిక్ నిబంధనలను కఠినంగా అమలు చేస్తున్నట్లు తెలిపారు. రోడ్డు ప్రమాదాలను మరింత తగ్గించడానికి అధునాతన సాంకేతిక పరిజ్ఞానాన్ని ఉపయోగిస్తున్నట్లు వెల్లడించారు.   2024 చివరి నాటికి ట్రాఫిక్ భద్రతా పనితీరులో సౌదీలోని అన్ని ప్రాంతాలలో తూర్పు ప్రావిన్స్ మొదటి స్థానంలో ఉందని తెలిపారు.