తెలుగు సినిమా ప్రముఖ కాస్టింగ్‌ డైరెక్టర్‌, సినీ నట శిక్షకుడు ఎన్‌.రమణానందరావు(52) కన్నుమూశారు. బ్రెయిన్‌స్ట్రోక్‌తో వారం రోజుల కిందట ఆసుపత్రిలో చేరిన ఆయన సోమవారం ఉదయం తుదిశ్వాస విడిచారు. తెలుగు సినీ పరిశ్రమలో ప్రముఖకాస్టింగ్‌ డైరెక్టర్‌, నట శిక్షకుడైన రమణానందరావు 1964లోజన్మించారు. పస్తుతం నాగోలు సమీపంలోని గణేష్‌నగర్‌లో ఉంటున్నారు. హిందీ, ఇంగ్లిష్‌ భాషల్లో కథలు కూడా రాసిన ఆయన.. రవీంద్రభారతి, ఆల్‌ ఇండియా రేడియోలో నాటకాలు కూడా వేశాడు. ప్రముఖ దర్శకుడు రాంగోపాల్‌వర్మ, తేజలతో ఏర్పడిన పరిచయాలతో సినీ పరిశ్రమలో తన ముద్ర వేసుకున్నారు. సినీ నటులకు శిక్షణ కూడా అందించారు. హీరోలు ఉదయ్‌కిరణ్‌, నితిన్‌, నవదీప్‌, నవీన్‌చంద్ర, జైగణిగంటి తదితర నటులు శిక్షణ పొందినట్లు సన్నిహితులు తెలిపారు. సోమవారం సాయంత్రం నాగోలు శ్మశానవాటికలో అంత్యక్రియలు నిర్వహించారు. మ్యూజిక్‌ డైరెక్టర్‌ ఆర్‌పీ.పట్నాయక్‌, సింగర్‌ సందీప్‌, నటుడు మధునందన్‌ హాజరయ్యారు.