భారతదేశం టెక్నాలజీ రంగంలో మరో విప్లవాత్మక ముందడుగు వేయబోతోంది. ఇప్పటి వరకు కృత్రిమ మేధస్సు (AI) టెక్నాలజీ కోసం అమెరికా, చైనా, లేదా ఇతర దేశాలపై ఆధారపడాల్సి వచ్చిన పరిస్థితి త్వరలో మారనుంది. భారత ప్రభుత్వం స్వదేశీ ఏఐ ప్లాట్‌ఫారమ్ అభివృద్ధిపై వేగంగా పనిచేస్తోంది. కేంద్ర ఎలక్ట్రానిక్స్ మరియు ఐటీ శాఖ (MeitY) సెక్రటరీ కృష్ణన్ తెలిపారు, “దేశీయ ఏఐ ప్రాజెక్ట్ పనులు చివరి దశలో ఉన్నాయి. ఈ ఏడాది చివరినాటికి పూర్తి అవుతుంది. 2026 ఫిబ్రవరిలో అధికారికంగా లాంచ్ చేయాలని లక్ష్యంగా పెట్టుకున్నాం” అని అన్నారు. ఈ ప్రాజెక్ట్ ద్వారా భారతదేశం టెక్నాలజీ స్వావలంబన దిశగా కీలకమైన మైలురాయిని చేరుకోనుంది.

ఈ స్వదేశీ ఏఐ ప్లాట్‌ఫారమ్‌కు 38,000 గ్రాఫిక్ ప్రాసెసింగ్ యూనిట్లు (GPUs) సమకూరనున్నాయని కృష్ణన్ వెల్లడించారు. అంత పెద్ద స్థాయిలో GPU లను ఉపయోగించడం వల్ల కంప్యూటర్ ఇన్ఫ్రాస్ట్రక్చర్ సామర్థ్యం అనూహ్యంగా పెరగనుంది. డేటా ప్రాసెసింగ్ వేగం, మెషిన్ లెర్నింగ్ సామర్థ్యం, మరియు మోడల్ ట్రైనింగ్ సమయం గణనీయంగా తగ్గనుంది. ఇది భారత సాంకేతిక రంగానికి కొత్త దిశను చూపించే ప్రాజెక్ట్గా భావిస్తున్నారు. కృత్రిమ మేధస్సు రంగంలో భారత్ తన సొంత సాఫ్ట్‌వేర్, హార్డ్‌వేర్, మరియు ట్రైనింగ్ మోడల్స్‌ను అభివృద్ధి చేసుకోవడం ద్వారా డేటా భద్రత, సాంకేతిక స్వాతంత్ర్యం రెండింటినీ సాధించగలదని నిపుణులు అభిప్రాయపడుతున్నారు.

ఈ ప్రాజెక్ట్ ‘ఇండియా సెమీకండక్టర్ మిషన్ 2.0’ లో భాగంగా కీలక పాత్ర పోషించనుంది. ఏఐ మౌలిక సదుపాయాలు దేశీయంగా సిద్ధమవడం వల్ల, భారత స్టార్టప్‌లు, పరిశోధనా సంస్థలు, మరియు ప్రభుత్వ సంస్థలు తక్కువ ఖర్చుతో అధునాతన ఏఐ పరిష్కారాలను అభివృద్ధి చేయగలవు. ఇది “మేడ్ ఇన్ ఇండియా” భావనను మరింత బలపరచడమే కాకుండా, గ్లోబల్ ఏఐ ఎకానమీలో భారతదేశానికి ప్రత్యేక స్థానం కల్పిస్తుంది. దేశానికి టెక్నాలజీ పరంగా స్వయం సమృద్ధి సాధన దిశగా ఇది చారిత్రాత్మక అడుగుగా నిలుస్తుందని నిపుణులు విశ్లేషిస్తున్నారు.