మనామా: బహ్రెయిన్ లో జపాన్ రాయబార కార్యాలయం మల్కియా బీచ్‌లో ‘వన్ ఓషన్, అవర్ ఫ్యూచర్ ’ పేరిట నిర్వహించిన బీచ్ క్లీనింగ్ ప్రోగ్రామ్ విజయవంతమైంది. 300 మంది వాలంటీర్లు ఈ కార్యక్రమంలో పాల్గొన్నారు. సముద్ర పర్యావరణ వ్యవస్థ రక్షణకు తమ వంతు సహకారాన్ని అందించారు. బీచ్ నుండి అనేక వ్యర్థాలను తొలగించారు.  

సముద్ర రక్షణను పెంపొందించడానికి జపాన్ రాయబార కార్యాలయం నిబద్ధతతో పనిచేస్తుందని బహ్రెయిన్ లోని జపాన్ రాయబారి అసాకో ఓకేఐ వెల్లండించారు. ఈ సందర్భంగా వాలంటీర్లకు ధన్యవాదాలు తెలిపారు. నవంబర్ 27 నుండి డిసెంబర్ 4 వరకు జరిగే జపాన్ అనిమే ఫెస్ట్ లో భాగంగా ఉత్తమ ప్రశంసలు అందుకున్న ఎనిమిది జపనీస్ యానిమేటెడ్ సినిమాలను ప్రదర్శించనున్నట్లు తెలిపారు.  జపాన్ - బహ్రెయిన్ మధ్య బంధాలను బలోపేతం చేయడం లక్ష్యంగా రాయబార కార్యాలయం భవిష్యత్ కార్యక్రమాలను ప్రకటిస్తూనే ఉంటుందని పేర్కొన్నారు.