ప్రపంచంలోనే అతిపెద్దదైన ఉభయచర విమానాన్ని చైనా ఆవిష్కరించింది. కార్చిచ్చును ఆర్పడానికి, సముద్రంలో కార్యకలాపాలు వంటి అవసరాలకు ఇది ఉపయోగపడుతుంది. బోయింగ్‌, ఎయిర్‌బస్‌ వంటి విదేశీ సంస్థలపై ఆధారపడటాన్ని తగ్గించుకోవాలనుకుంటున్న చైనా వైమానిక రంగానికి ఇదో ముందడుగు.
ఏజీ600 అనే ఈ విమానాన్ని ఝుహాయ్‌ నగరంలోని కర్మాగరంలో ఆవిష్కరించారు. 53.5 టన్నుల బరువుతో గాల్లోకి లేవగలదు. గరిష్ఠంగా 4500 కిలోమీటర్ల దూరం ప్రయాణించగలదు. 20 సెకన్లలోనే 12 టన్నుల నీటిని సేకరించగలదు. ఇది దాదాపుగా బోయింగ్‌ 737 విమానం పరిమాణంలో ఉంటుంది. ఇది నేలతోపాటు నీటిపై నుంచి కూడా పైకి లేవగలదు, దిగగలదు. జపాన్‌, వియత్నాం, ఫిలిప్పీన్స్‌ వంటి పొరుగు దేశాలతో సముద్ర సరిహద్దు వివాదమున్న నేపథ్యంలో ఆ ప్రాంతాల్లో తన కార్యకలాపాలకు ఈ విమానం తోడ్పాటు అందిస్తుందని చైనా భావిస్తోంది.