వాషింగ్టన్: సౌదీ క్రౌన్ ప్రిన్స్ మొహమ్మద్ బిన్ సల్మాన్ అమెరికా పర్యటన విజయవంతం అయింది. తన పర్యటనలో భాగంగా అమెరికా అధ్యక్షుడు డొనాల్డ్ ట్రంప్ తో సమావేశమయ్యారు. ఈ సందర్భంగా రెండు దేశాల మధ్య  చారిత్రాత్మక స్నేహ బంధాలు, వ్యూహాత్మక భాగస్వామ్యం ఏర్పడిందని ఈ సందర్భంగా విడుదల చేసిన సంయుక్త ప్రకటనలో తెలిపారు.

క్రౌన్ ప్రిన్స్ ను అమెరికా అధ్యక్షుడు ట్రంప్ వైట్ హౌస్‌లో స్వాగతం పలికారు. ఇద్దరు నాయకులు సౌదీ-యుఎస్ శిఖరాగ్ర సమావేశంలో పాల్గొన్నారు. ఈ సందర్భంగా ఇరుపక్షాలు వ్యూహాత్మక భాగస్వామ్యాన్ని బలోపేతం చేయడానికి అవసరమైన చర్యలపై సమీక్షించారు.  రాజకీయ, ఆర్థిక, రక్షణ మరియు సాంకేతిక రంగాలలో సహకారాన్ని పెంపొందించేలా పలు రంగాల్లో ఒప్పందాలు చేసుకున్నారు.  ముఖ్యంగా వ్యూహాత్మక రక్షణ ఒప్పందం, AI వ్యూహాత్మక భాగస్వామ్యం, పౌర అణు సహకారంపై చర్చలు జరిపారు.

యుఎస్-సౌదీ పెట్టుబడి ఫోరంలో క్రౌన్ ప్రిన్స్ మరియు అధ్యక్షుడు ట్రంప్ పాల్గొన్నారు. ఈ సందర్భంగా సుమారు $270 బిలియన్ల విలువైన ఒప్పందాలను ప్రకటించారు.