అమరావతి: హేమలత రెడ్డి ఒక ప్రతిభావంతమైన, బహుముఖ వ్యక్తిత్వం. నటిగా, నిర్మాతగా, యాంకర్‌గా తన కెరీర్‌ను ప్రారంభించిన ఆమె, ఆ తర్వాత ప్రొఫెషనల్ మోడలింగ్ మరియు బ్యూటీ పేజెంట్రీ రంగాల్లోకి అడుగుపెట్టారు.క్రమశిక్షణ, ఆత్మవిశ్వాసం, సహనం మరియు నిరంతర కృషితో ఆమె తనదైన ప్రత్యేక గుర్తింపును సంపాదించుకున్నారు.

జాతీయ, అంతర్జాతీయ వేదికలపై భారతదేశాన్ని గర్వంగా ప్రతినిధ్యం వహిస్తూ హేమలత రెడ్డి Mrs India 2024 అనే ప్రతిష్ఠాత్మక టైటిల్‌ను గెలుచుకున్నారు.అంతేకాదు, Mrs Universe – International Global Queen 2025 అనే అంతర్జాతీయ గౌరవాన్ని కూడా అందుకొని, తన ప్రతిభతో పాటు భారతీయ సంస్కృతీ విలువలను ప్రపంచానికి చాటిచెప్పారు.

ఇన్ని అంతర్జాతీయ విజయాలు సాధించినప్పటికీ, తన స్వస్థలమైన ఆంధ్రప్రదేశ్‌లో తనను తాను నిరూపించుకోవాలనే భావోద్వేగ బాధ్యత ఆమెను ముందుకు నడిపించింది. విశాఖపట్నంలో జన్మించి పెరిగిన హేమలత రెడ్డికి ఆంధ్రప్రదేశ్ ఎల్లప్పుడూ హృదయానికి దగ్గరగానే ఉంటుంది. స్వంత నేలపై గుర్తింపు పొందినప్పుడే తన విజయానికి సంపూర్ణత వస్తుందని ఆమె నమ్మకం.

ఈ దృఢమైన సంకల్పంతో ఆమె విజయవాడను వేదికగా ఎంచుకొని, మిస్ & మిసెస్ ఆంధ్రప్రదేశ్–విజయవాడ 2025 పేజెంట్‌లో పాల్గొన్నారు. ఇది కేవలం పోటీ మాత్రమే కాకుండా, ఆంధ్రప్రదేశ్‌ను జాతీయ,అంతర్జాతీయ వేదికల పై మరింత గౌరవంగా నిలబెట్టాలనే ఆమె లక్ష్యానికి ప్రతీకగా నిలిచింది.

ఈ ప్రతిష్ఠాత్మక బ్యూటీ పేజెంట్ 12 డిసెంబర్ 2025న విజయవాడలోని ఎస్‌ఎస్ కన్వెన్షన్ హాల్‌లో ఘనంగా నిర్వహించబడింది. ప్రముఖ ఫ్యాషన్ ఐకాన్, పేజెంట్ మెంటార్ అయిన  సతీష్ అడ్డాల మార్గదర్శకత్వంలో ఈ కార్యక్రమం అద్భుతంగా సాగింది.

షో డైరెక్టర్‌గా వ్యవహరించిన సతీష్ అడ్డాల, మహిళా సాధికారతకు అంకితభావంతో, క్రమశిక్షణతో ఈ పేజెంట్‌ను అత్యున్నత స్థాయికి తీసుకెళ్లారు. ఇది ఆయన నిర్వహించిన 43వ ప్రతిష్ఠాత్మక ఫ్యాషన్ & బ్యూటీ ఈవెంట్ కావడం విశేషం.

అంతర్జాతీయ పేజెంట్ టైటిల్ హోల్డర్ అయిన హేమలత రెడ్డి (కాంటెస్టెంట్ నెం.18)కి శ్రీమతి ఆంధ్రప్రదేశ్ 2025 కిరీటం అందజేయబడింది.అదేవిధంగా, ఆమె అద్భుతమైన ప్రదర్శనకు గాను బెస్ట్ టాలెంట్ రౌండ్ విజేత అవార్డును కూడా సొంతం చేసుకున్నారు.

ఆడిషన్స్ నుంచి గ్రాండ్ ఫినాలే వరకు ఆమె చేసిన ప్రయాణం అనేక మహిళలకు ప్రేరణగా నిలిచింది.స్వరాష్ట్రంలో పోటీపడి కిరీటం సాధించడం ఆమెకు గర్వకారణమైన, భావోద్వేగభరితమైన అనుభవంగా నిలిచింది.