జర్నలిస్టుల కుటుంబాలకు అండగా మీడియా అకాడమీ..రూ.లక్ష ఆర్థిక సహాయం
- February 05, 2026
హైదరాబాద్: తెలంగాణ మీడియా అకాడమీ, మరణించిన జర్నలిస్టుల కుటుంబాలకు అండగా నిలిచింది. వారి కుటుంబాలకు ఆర్థిక సహాయం అందించడంతో పాటు, ప్రముఖ జర్నలిస్టుల జీవిత విశేషాలతో కూడిన చిరు పుస్తకాలను ఆవిష్కరించింది. బుధవారం నాడు హైదరాబాద్ నాంపల్లిలోని మీడియా అకాడమీ ఆడిటోరియంలో జరిగిన ఈ కార్యక్రమానికి శాసనమండలి చైర్మన్ గుత్తా సుఖేందర్ రెడ్డి, ప్రభుత్వ సలహాదారు కె. కేశవరావు ముఖ్య అతిథులుగా హాజరయ్యారు.
ఈ సందర్భంగా గుత్తా సుఖేందర్ రెడ్డి మాట్లాడుతూ, అక్షరాన్నే ఆయుధంగా చేసుకుని క్షేత్రస్థాయిలో పనిచేసే జర్నలిస్టులు అకాల మరణం చెందడం బాధాకరమని అన్నారు. మరణించిన జర్నలిస్టుల కుటుంబాలకు అండగా నిలుస్తూ, వారికి ఆర్థిక భరోసా కల్పిస్తున్న మీడియా అకాడమీ చైర్మన్ను ఆయన అభినందించారు. రాష్ట్ర ప్రభుత్వం జర్నలిస్టుల సంక్షేమ నిధి నుంచి లక్ష రూపాయల ఆర్థిక సహాయంతో పాటు, ఐదేళ్లపాటు పెన్షన్ అందిస్తుండటం బాధిత కుటుంబాలకు గొప్ప ఊరట అని పేర్కొన్నారు. ప్రముఖ జర్నలిస్టుల జీవిత విశేషాలతో కూడిన చిరు పుస్తకాల (మోనోగ్రాఫ్స్) ఆవిష్కరణ, రాబోయే తరాలకు స్ఫూర్తిదాయకంగా నిలుస్తుందన్నారు. ఎన్ని ఎలక్ట్రానిక్ మీడియా సాధనాలు వచ్చినా, తాను మాత్రం ఇప్పటికీ పత్రిక చదివితేనే సంతృప్తి చెందుతానని తన అభిప్రాయాన్ని పంచుకున్నారు.
ప్రభుత్వ సలహాదారు కె. కేశవరావు మాట్లాడుతూ, ప్రముఖుల జీవిత చరిత్రను మోనోగ్రాఫ్గా తీసుకురావడం ప్రశంసనీయమన్నారు. సమాజానికి వార్త అద్దం పడితే, దాని వెనకున్న నిజాన్ని నిగ్గు తేల్చిన జర్నలిస్టు భవిష్యత్ తరాలకు మార్గదర్శి అవుతారని అన్నారు. సోషల్ మీడియాను నియంత్రించడం ఎవరి తరం కాదని, దానిపై జర్నలిస్టులందరూ ఏకతాటిపైకి వచ్చి వర్క్షాప్లు నిర్వహించడం ద్వారా కొంత మార్పునకు నాంది పలకాలని సూచించారు.
మీడియా అకాడమీ చైర్మన్ కె. శ్రీనివాస్ రెడ్డి మాట్లాడుతూ, మరణించిన 18 మంది జర్నలిస్టుల కుటుంబాలకు తలా లక్ష రూపాయల చొప్పున, ప్రమాదానికి గురైన మరో జర్నలిస్టుకు రూ. 50,000 ఆర్థిక సహాయం చెక్కుల రూపంలో అందించినట్లు తెలిపారు. అలాగే, ప్రముఖ పాత్రికేయులు అబిద్ అలీఖాన్, డి. సీతారాం, పొత్తూరి వెంకటేశ్వరరావు, ఎ.బి.కె. ప్రసాద్, సి. రాఘవాచారి సహా 10 మంది దిగ్గజాలపై మీడియా అకాడమీ ప్రచురించిన మోనోగ్రాఫ్లను ఆవిష్కరించినట్లు వివరించారు. ఈ కార్యక్రమంలో మీడియా అకాడమీ కార్యదర్శి నాగులపల్లి వెంకటేశ్వర రావు, పలువురు సీనియర్ జర్నలిస్టులు పాల్గొన్నారు.
తాజా వార్తలు
- ఫిలిప్పీన్స్లోని బొంగావోలో అర్ధరాత్రి మంటలు: 1,000 కి పైగా ఇళ్లు దగ్ధం
- భారతీయ ఉపాధ్యాయురాలిని అత్యుత్తమ పురస్కారంతో సత్కరించిన దుబాయ్ క్రౌన్ ప్రిన్స్..
- DPDP గడువు కుదింపుతో భారత స్టార్టప్ పర్యావరణ వ్యవస్థకు సవాళ్లు
- ఇది సభ సంప్రదాయం కాదు: స్పీకర్ ఓం బిర్లా
- ఐఐటీ హైదరాబాద్లో ప్రాజెక్ట్ స్టాఫ్ పోస్టులు
- అక్రమ మద్యం రహిత రాష్ట్రంగా ఘనత సాధించిన ఏపీ: మంత్రి రవీంద్ర
- జర్నలిస్టుల కుటుంబాలకు అండగా మీడియా అకాడమీ..రూ.లక్ష ఆర్థిక సహాయం
- బొగ్గు గనిలో పేలుడు 10 మంది మృతి మేఘాలయలో విషాదం!
- సైబర్ మోసాలకు చెక్.. వింగో యాప్ క్లోజ్!
- స్కూల్ అడ్మిషన్స్..కొత్త కట్ ఆఫ్ తేదీ పై పేరెంట్స్ ఆందోళన..!!







