జెడ్డా: సౌదీ అరేబియాలో చాలా ప్రాంతాలలో మోస్తరు నుండి భారీ వర్షాలు కురిసే అవకాశం ఉందని జాతీయ వాతావరణ కేంద్రం (ఎన్‌సిఎం) తెలిపింది. తూర్పు ప్రావిన్స్, మక్కా, మదీనా, అల్-బహా మరియు అసిర్‌లోని కొన్ని ప్రాంతాలలో పరిస్థితులు వేగంగా మారుతాయని ప్రకటించింది. కొన్ని సందర్భాల్లో బలమైన గాలుల వల్ల దుమ్ము, ఇసుక రేగవచ్చని, వడగళ్ల వాన కూడా పడే అవకాశం ఉందని కేంద్రం తెలిపింది.

ఈ సందర్భంగా రాబోయే రోజుల్లో సౌదీని ప్రభావితం చేసే అవకాశం ఉన్న తుఫానుల గురించి ప్రచారంలో ఉన్న నివేదికలను ఎన్‌సిఎం ఖండించింది.  ప్రజలు అధికారిక వర్గాలపై ఆధారపడాలని మరియు భద్రతా సూచనలను పాటించాలని కోరింది.

మార్చి 23 నుండి 28 వరకు చాలా ప్రాంతాలలో వేర్వేరు తీవ్రతలతో ఉరుములతో కూడిన వర్షాలు కొనసాగుతాయని గతంలోనే అంచనా వేసినట్లు కేంద్రం తెలిపింది. 

తబూక్, అల్-జౌఫ్, హైల్ మరియు ఉత్తర సరిహద్దు ప్రాంతాలలో మోస్తరు నుండి భారీ వర్షాలు కురిసే అవకాశం ఉంది. ఇది మదీనాలోని కొన్ని ప్రాంతాలకు కూడా విస్తరిస్తుంది. నేటి సాయంత్రం నుండి రేపటి వరకు పరిస్థితులు మరింత తీవ్రమవుతాయని జాతీయ వాతావరణ కేంద్రం తెలిపింది.

జెడ్డా, రాబిగ్ మరియు తైఫ్‌లతో సహా మక్కా ప్రాంతంలో తేలికపాటి నుండి మోస్తరు వర్షాలు..  అల్-బహా, అసిర్ మరియు జాజాన్‌లలో కూడా మోస్తరు నుండి భారీ వర్షాలు కురుస్తాయని తెలిపింది.  

రియాద్ ప్రాంతంలో ముఖ్యంగా దక్షిణ మరియు పశ్చిమ ప్రాంతాలలో వర్షం తేలికపాటి నుండి మోస్తరుగా ప్రారంభమై వారాంతానికి తీవ్రమవుతుందని పేర్కొంది. ఈ పరిస్థితులు అల్-ఖస్సిమ్ మరియు తూర్పు ప్రావిన్స్‌కు కూడా విస్తరిస్తాయని తెలిపింది.  

గంటకు 60 కిలోమీటర్లకు మించిన వేగంతో బలమైన గాలులు, ఆకస్మిక వరదలు, వడగళ్ళు మరియు తీర ప్రాంతాలలో ఎత్తైన అలలు సంభవించవచ్చని, కొన్ని సందర్భాల్లో టోర్నడో ఏర్పడే అవకాశం కూడా ఉందని నివేదికలో హెచ్చరించింది.