ఇరాన్ నుంచి ముడి చమురు కొనుగోలు చేసినట్లు వస్తున్న వార్తల పై Reliance Industries Limited స్పష్టత ఇచ్చింది.ఈ ఆరోపణలను కంపెనీ పూర్తిగా ఖండిస్తూ అధికారిక ప్రకటన విడుదల చేసింది.

ఇటీవల కొన్ని మీడియా కథనాల్లో రిలయన్స్ ఇరాన్ నుంచి చమురు కొనుగోలు చేసిందని ప్రచారం జరిగింది. అయితే ఈ వార్తలు పూర్తిగా నిరాధారమని, ప్రజలను తప్పుదారి పట్టించేలా ఉన్నాయని కంపెనీ పేర్కొంది. వాస్తవాలను ధృవీకరించకుండా ప్రచురించవద్దని మీడియాకు సూచించింది.

అమెరికా ప్రభుత్వం సముద్రంలో చిక్కుకుపోయిన ఇరాన్ చమురు అమ్మకానికి తాత్కాలిక అనుమతి ఇవ్వడం ఈ వార్తలకు కారణమైంది. ఈ నేపథ్యంలో కొన్ని నివేదికలు రిలయన్స్ ఈ అవకాశాన్ని ఉపయోగించుకుందని పేర్కొన్నాయి. కానీ కంపెనీ ఈ విషయాన్ని ఖండించింది.

ఈ నిర్ణయంతో ప్రపంచ మార్కెట్‌లో ఇరాన్ చమురు సరఫరా పెరిగే అవకాశం ఉంది. అయితే రిలయన్స్ తమపై వచ్చిన ఆరోపణలను తిరస్కరించడం, అంతర్జాతీయ ఇంధన మార్కెట్ పరిస్థితులపై మరోసారి చర్చకు దారి తీసింది.