యూఏఈ: ఏప్రిల్ 1న షార్జాలో వర్షపు నీటి మడుగులో మునిగి ఒక బాలుడు మరణించినట్లు ఆ ఎమిరేట్ పోలీసులు ఒక ప్రకటనలో వెల్లడించారు. సాయంత్రం 7.05 గంటలకు ఈ ఘటనపై అధికారులకు సమాచారం అందింది. ఆ తర్వాత సహాయక బృందాలు, అంబులెన్స్‌లతో పాటు ప్రత్యేక బృందాలను ఘటనా స్థలానికి పంపించగా, ఆ చిన్నారిని ఆసుపత్రికి తరలించారు. అప్పటికే అతడు మరణించినట్లు డాక్టర్లు తెలిపారని పోలీసులు తమ ప్రకటనలో పేర్కొన్నారు.
వర్షపు నీరు నిలిచే ప్రదేశాలలో ఈత కొట్టవద్దని, పిల్లలపై మరింత నిఘా ఉంచాలని షార్జా పోలీసులు తల్లిదండ్రులను హెచ్చరించారు. తమ పిల్లలు ఎక్కడున్నారో గమనిస్తూ ఉండాలని సూచించింది.
వర్షపు నీరు నిలిచిపోయే ప్రదేశాలు లోతుగా ఉంటాయని, ప్రమాదాన్ని అంచనా వేయడం కష్టంగా ఉంటుందని, అలాగే అకస్మాత్తుగా కొండచరియలు విరిగిపడే అవకాశం, బురద ఏర్పడే అవకాశం ఉంటుందని, దీనివల్ల మునిగిపోయే ప్రమాదాలు లేదా తీవ్రమైన గాయాలయ్యే ప్రమాదం పెరుగుతుందని సూచించింది.
 నిర్దేశించని ప్రదేశాలలో ఈత కొట్టడం వల్ల కలిగే ప్రమాదాల గురించి పిల్లలకు అవగాహన కల్పించడం, నివారణ మార్గదర్శకాలను పాటించడం వంటి వాటి ప్రాముఖ్యతను పోలీసులు వివరించారు. అత్యవసరం కాని కేసుల కోసం 901కు, అత్యవసర పరిస్థితుల్లో 999కు  సాయం కోసం కాల్ చేయాలని కోరారు.