హైదరాబాద్: హైదరాబాద్ రియల్ ఎస్టేట్ రంగంలో మహిళా కొనుగోలుదారుల ప్రాతినిధ్యం గణనీయంగా పెరుగుతోంది.గృహ రుణాల్లో లభిస్తున్న ప్రత్యేక వడ్డీ రాయితీలు, ఆస్తి పన్నులో మినహాయింపులు , మారుతున్న సామాజిక, ఆర్థిక పరిస్థితులతో మహిళల పేరిట జరుగుతున్న ఆస్తి రిజిస్ట్రేషన్లు గత ఏడాదితో పోలిస్తే 12 శాతం వృద్ధిని నమోదు చేశాయి. కేవలం గృహిణులు మాత్రమే కాకుండా, ఐటీ, కార్పొరేట్ రంగాల్లో స్థిరపడిన యువతులు సైతం రియల్ ఎస్టేట్‌ను సురక్షితమైన పెట్టుబడిగా భావిస్తున్నారు.

మహిళలను సొంతింటి యజమానులుగా ప్రోత్సహించేందుకు బ్యాంకులు , ఆర్థిక సంస్థలు గృహ రుణాలపై సాధారణం కంటే 0.05% నుండి 0.1% వరకు తక్కువ వడ్డీని ఆఫర్ చేస్తున్నాయి. దీనికి తోడు, ప్రధానమంత్రి ఆవాస్ యోజన వంటి పథకాల కింద మహిళల పేరిట, సహ-యజమానులుగా ఆస్తి ఉంటే లభించే సబ్సిడీ ప్రయోజనాలు మధ్యతరగతి కుటుంబాలను ఆకర్షిస్తున్నాయి. తెలంగాణ ప్రభుత్వ విధానాల ప్రకారం, మహిళల పేరిట ఉన్న ఆస్తులకు కొన్ని సందర్భాల్లో ఆస్తి పన్నులో రాయితీలు ఉండటం కూడా ఈ ధోరణికి బలాన్ని చేకూర్చుతోంది.

అనరాక్ , నైట్ ఫ్రాంక్ వంటి సంస్థల తాజా నివేదికల ప్రకారం, హైదరాబాద్‌లోని గచ్చిబౌలి, తెల్లాపూర్, కొండాపూర్ వంటి ఐటీ కారిడార్లలో కొంటున్న లగ్జరీ అపార్ట్‌మెంట్లలో మహిళా కొనుగోలుదారుల వాటా గతంలో కంటే పెరిగింది. ఒకప్పుడు కేవలం పన్ను ఆదా కోసం మాత్రమే మహిళల పేర్లను ఉపయోగించేవారు, కానీ ఇప్పుడు వారి ఆర్థిక స్వతంత్రత పెరగడంతో సొంతంగా నిర్ణయాలు తీసుకుని ఇళ్లను కొనుగోలు చేస్తున్నారు. స్టాక్ మార్కెట్ మరియు బంగారం కంటే స్థిరాస్తి రంగమే అత్యధిక లాభాలను ఇస్తుందని 70 శాతం మంది మహిళా ఇన్వెస్టర్లు నమ్ముతున్నట్లు సర్వేలు వెల్లడిస్తున్నాయి.

మహిళా కొనుగోలుదారులు ఎక్కువగా 3BHK ఇళ్లపై మొగ్గు చూపుతున్నారు. భద్రత , మౌలిక సదుపాయాలు ఉన్న గేటెడ్ కమ్యూనిటీలకు ప్రథమ ప్రాధాన్యత ఇస్తున్నారు.