యూఏఈ: యూఏఈలో కాన్సులర్ సహాయక సేవలను అవుట్‌సోర్సింగ్ చేసేందుకు అబుదాబిలోని భారత రాయబార కార్యాలయం.. అల్హింద్ టూర్స్ & ట్రావెల్స్ ప్రైవేట్ లిమిటెడ్‌కు ఒక కాంట్రాక్టును అప్పగించింది. ఈ మేరకు ఒక అధికారిక ప్రకటనను జారీ చేసింది. 

ఈ కాంట్రాక్టులో అబుదాబిలోని రాయబార కార్యాలయం మరియు దుబాయ్‌లోని భారత కాన్సులేట్ జనరల్‌లో పాస్‌పోర్ట్, వీసా, ఓసీఐ, పోలీస్ క్లియరెన్స్ సర్టిఫికేట్లు (పీసీసీ), సరెండర్ సర్టిఫికేట్లు (ఎస్‌సీ), గ్లోబల్ ఎంట్రీ ప్రోగ్రామ్ (జీఈపీ) వెరిఫికేషన్ మరియు సంబంధిత అటెస్టేషన్ సహాయంతో సహా పలు సేవలు ఉన్నాయి.

నవంబర్ 2025లో జారీ చేసిన టెండర్‌ను అనుసరించి ఈ నిర్ణయం తీసుకున్నారు. షార్ట్‌లిస్ట్ చేసిన నాలుగు కంపెనీల ఆర్థిక బిడ్‌లను మార్చి 30న తెరిచారు. "ఆర్థిక బిడ్‌లను పరిశీలించిన తర్వాత... మెస్సర్స్ అల్హింద్ టూర్స్ & ట్రావెల్స్ ప్రైవేట్ లిమిటెడ్ వారి ఆర్థిక బిడ్‌ను అత్యల్ప ఆర్థిక బిడ్ (L1)గా ప్రకటించి... కాంట్రాక్టును కేటాయించడం జరిగింది." అని రాయబార కార్యాలయం తెలిపింది.

బి.ఎల్.ఎస్. ఇంటర్నేషనల్ చాలా సంవత్సరాలుగా యూఏఈలో భారత కాన్సులర్ అవుట్‌సోర్సింగ్ సేవలను నిర్వహించిన విషయం తెలిసిందే.  

అబుదాబిలోని రాయబార కార్యాలయం మరియు దుబాయ్‌లోని భారత కాన్సులేట్ జనరల్‌లో విస్తృత శ్రేణి సేవలను అవుట్‌సోర్సింగ్ చేయడానికి నవంబర్ 2025లో జారీ చేసిన టెండర్‌ను అనుసరించి ఈ నిర్ణయం తీసుకున్నట్లు అబుదాబిలోని భారత రాయబార కార్యాలయం ప్రకటించింది.

రాయబార కార్యాలయం ప్రకారం.. షార్ట్‌లిస్ట్ చేసిన నాలుగు కంపెనీలైన అల్హింద్, డీయూ డిజిటల్ గ్లోబల్ లిమిటెడ్, ఎస్‌జీఐవీఎస్ గ్లోబల్ ఎల్‌ఎల్‌సి మరియు వీఎఫ్‌ఎస్ గ్లోబల్ నుండి ఆర్థిక బిడ్‌లు రాగా.. అల్హింద్ అత్యల్ప బిడ్‌ను సమర్పించింది. గత సంవత్సరం కొత్త భారత మిషన్ కాంట్రాక్టుల కోసం బిడ్లు వేయకుండా బీఎల్ఎస్ ఇంటర్నేషనల్ సర్వీస్ లిమిటెడ్‌ను భారతదేశం రెండు సంవత్సరాల పాటు నిషేధించింది. అక్టోబర్ 9, 2025 నాటి విదేశీ వ్యవహారాల మంత్రిత్వ శాఖ (MEA) ఉత్తర్వులో కోర్టు కేసులు మరియు దరఖాస్తుదారుల ఫిర్యాదులతో సహా పలు ఆరోపణలను ప్రస్తావించారు. 

అల్హింద్ టూర్స్ & ట్రావెల్స్ ప్రైవేట్ లిమిటెడ్ అనేది అల్హింద్ గ్రూప్ ఆఫ్ కంపెనీలలో ఒక భాగం. ఈ కంపెనీకి ఐటీ సాఫ్ట్‌వేర్, లగ్జరీ రెంటల్స్, ఫారిన్ ఎక్స్ఛేంజ్ వంటి రంగాలలో పనిచేసిన అనుభవం ఉంది. కేరళలో 1992లో స్థాపించబడిన ఈ సంస్థ, 1995లో యూఏఈ మరియు ఇతర మిడిలీస్టు దేశాలలో తన కార్యకలాపాలను ప్రారంభించింది. గత సంవత్సరం, భారత్ లో తన దేశీయ విమానయాన సేవలను ప్రారంభించడానికి ఈ సంస్థ 'నిరభ్యంతర పత్రాన్ని' (NOC) పొందింది.