కువైట్: బెంగాలీ కల్చరల్ సొసైటీ (BCS) కువైట్‌కు సంఘీభావం ప్రకటించింది. ఫింటాస్‌లో కువైట్ నేషనల్ ప్లవర్ అయిన అర్ఫాజ్ పువ్వుల తయారీ వర్క్‌షాప్‌ను నిర్వహించింది. చైతాలి బి రాయ్ పర్యవేక్షణలో BCS అధ్యక్షుడు అలోకేష్ రాయ్ నేతృత్వంలో ఈ కార్యక్రమం జరిగింది. వర్క్‌షాప్‌ లో భాగంగా పలువురు కువైట్ జాతీయ పుష్పమైన అర్ఫాజ్‌ను చేతితో తయారు చేశారు. ఈ పుష్పాన్ని ఓర్పు మరియు ఐక్యతకు చిహ్నంగా పరిగణిస్తారు.
ఈ సందర్భంగా పలువురు తమ అభిప్రాయాలను పంచుకున్నారు. దశాబ్దాలుగా, కువైట్ తరతరాల భారతీయులకు రెండవ ఇల్లుగా ఉందని అలోకేష్ రాయ్ అన్నారు. ఈ వర్క్‌షాప్‌ను తమ సంఘీభావానికి మరియు ప్రశంసలకు ఒక చిన్న హృదయపూర్వక వ్యక్తీకరణగా ఆయన అభివర్ణించారు.

అత్యంత కఠినమైన పరిస్థితులలో కూడా అర్ఫాజ్ పువ్వు  వికసిస్తుందని, కువైట్  దృఢ సంకల్పం పట్ల భారతీయ సమాజానికి ప్రగాఢమైన విశ్వాసం ఉందని చైతాలి బి రాయ్ అన్నారు. ఇంకా కువైట్ ఐరన్ లేడీగా విస్తృతంగా పేరుగాంచిన సారా అక్బర్ ఈ కార్యక్రమానికి హాజరయ్యారు. కువైట్‌లోని ప్రతి రంగంలోనూ అభివృద్ధి, సేవ మరియు దైనందిన జీవితాన్ని నడిపించడంలో భారతీయ సమాజం కీలక పాత్ర పోషిస్తుందని ఆమె అన్నారు.
ఆరోగ్య సంరక్షణ వంటి రంగాలలో భారతీయ నిపుణులు తరచుగా ముందు వరుసలో ఉంటారని, వారి అంకితభావం మరియు నైపుణ్యం ఎంతో ప్రశంసనీయం అని అక్బర్ పేర్కొన్నారు.  ఈ వర్క్‌షాప్‌ను కువైట్ పట్ల ఐక్యతకు, మద్దతుకు ఒక అర్థవంతమైన ప్రదర్శనగా అభివర్ణించారు. ఈ కార్యక్రమంలో ఇండియన్ డాక్టర్స్ ఫోరం (IDF), ఇన్‌స్టిట్యూట్ ఆఫ్ చార్టర్డ్ అకౌంటెంట్స్ ఆఫ్ ఇండియా (ICAI) కువైట్ శాఖ ప్రతినిధులు కూడా పాల్గొన్నారు.