మనామా: బహ్రెయిన్ మానవ అక్రమ రవాణాను ఎదుర్కోవడానికి అధికారులు కఠిన చర్యలు తీసుకుంటున్నారు. అటువంటి నేరాలను పరిష్కరించడంలో అంతర్జాతీయ సంస్థల సమన్వయంతో పనిచేస్తున్నారు. ఇందులో భాగంగా పలు భద్రతా పరమైన ఆపరేషన్లను నిర్వహించారు. ముఖ్యంగా మహిళలను చట్టవిరుద్ధ కార్యకలాపాలకు బలవంతం చేయడాన్ని తీవ్రంగా పరిగణిస్తున్నారు. ఇదే ఆరోపణలపై ఒక ఆసియా వ్యక్తితోపాటు మహిళను అరెస్టు చేసినట్లు అంతర్గత వ్యవహారాల మంత్రిత్వ శాఖ ప్రకటించింది.

ఈ కేసుకు సంబంధించిన సమాచారం అందిన తర్వాత క్రిమినల్ ఇన్వెస్టిగేషన్ మరియు ఫోరెన్సిక్ సైన్స్ జనరల్ డైరెక్టరేట్ ఆధ్వర్యంలో పనిచేస్తున్న మానవ అక్రమ రవాణా నిరోధక మరియు ప్రజా నైతిక పరిరక్షణ విభాగం ఈ ఆపరేషన్‌ను విజయవంతంగా నిర్వహించిందని వెల్లడించారు. అనుమానితులను గుర్తించి, అరెస్టు చేసినట్లు అధికారులు తెలిపారు. నిందితులపై చట్టపరమైన ప్రక్రియలు పూర్తి చేశామని, తదుపరి చర్యల కోసం ఈ కేసును పబ్లిక్ ప్రాసిక్యూషన్‌కు అప్పగించినట్లు మంత్రిత్వ శాఖ వెల్లడించింది.