కువైట్: కుటుంబ స్థిరత్వాన్ని, సామాజిక భద్రతను బలోపేతం చేసే లక్ష్యంతో రూపొందించిన కువైట్ తొలి ప్రభుత్వ ఫ్యామిలీ ప్రొటెక్షన్ ప్రోగ్రామ్ కు కేబినెట్ ఆమోదం తెలిపిందని సామాజిక వ్యవహారాలు, కుటుంబ, బాల్య వ్యవహారాల శాఖ మంత్రి డాక్టర్ అమ్తల్ అల్-హువైలా ప్రకటించారు. కుటుంబ, బాలల రక్షణ వ్యవస్థను అభివృద్ధి చేయడానికి, సామాజిక సవాళ్లను పరిష్కరించడానికి ప్రభుత్వం చేస్తున్న ఉమ్మడి ప్రయత్నాలకు ఈ కార్యక్రమం నిదర్శనమని అల్-హువైలా తెలిపారు.

సామాజిక, న్యాయ, ఆరోగ్య, విద్యా, భద్రతా వ్యవహారాలకు సంబంధించిన ఏజెన్సీలను భాగస్వామ్యం చేయడం ద్వారా ఈ కార్యక్రమాన్ని ప్రభుత్వం అమలు చేస్తుందని తెలిపారు. కుటుంబ రక్షణ వ్యవస్థ సామర్థ్యాన్ని మెరుగుపరచడం, చట్టాలు మరియు విధానాలను అప్డెట్ చేయడం..అలాగే అవగాహన మరియు మానసిక, సామాజిక పునరావాస కార్యక్రమాలకు మద్దతు ఇవ్వడం వంటి చర్యలు కూడా ఈ కార్యక్రమంలో ఉన్నాయని అల్-హువైలా తెలిపారు. కుటుంబ రక్షణ అనేది ఒక జాతీయ ప్రాధాన్యతగా ఉందని చెప్పారు. కువైట్ సామాజిక అభివృద్ధి లక్ష్యాలకు అనుగుణంగా కుటుంబ స్థిరత్వాన్ని బలోపేతం చేయడానికి మరియు జీవన నాణ్యతను మెరుగుపరచడానికి ప్రభుత్వం కట్టుబడి ఉందని ఈ కార్యక్రమం ప్రతిబింబిస్తుందని వెల్లడించారు.