దుబాయ్: యూఏఈ ఉపాధ్యక్షుడు, ప్రధాన మంత్రి, దుబాయ్ పాలకుడు హిజ్ హైనెస్ షేక్ మహమ్మద్ బిన్ రషీద్ అల్ మక్తూమ్ 2025 సంవత్సరానికి సంబంధించిన ఎమిరేట్స్ టూరిజం కౌన్సిల్ నివేదికను సమీక్షించారు. ఈ సందర్భంగా దేశ పర్యాటక రంగం సాధించిన పురోగతిని అధికారులు వివరించారు.

2025లో యూఏఈ పర్యాటక రంగం స్థిరమైన వృద్ధిని నమోదు చేసింది. హోటళ్లలో బస చేసిన అతిథుల సంఖ్య 3.2 కోట్లకు పైగా చేరి, 2024తో పోలిస్తే 5.1 శాతం పెరిగింది. అలాగే హోటల్ రంగ ఆదాయం AED 49.21 బిలియన్లకు చేరి, గత ఏడాదితో పోలిస్తే 9.7 శాతం వృద్ధి నమోదైంది.

దేశవ్యాప్తంగా 1,240కు పైగా హోటల్ సంస్థల్లో మొత్తం 2.17 లక్షల హోటల్ గదులు అందుబాటులో ఉన్నాయని నివేదిక వెల్లడించింది. హోటల్ ఆక్యుపెన్సీ రేటు 79.5 శాతంగా నమోదై, ప్రాంతీయంగానే కాక ప్రపంచ స్థాయిలో కూడా అత్యుత్తమ స్థాయిలో నిలిచింది. ఇది యూఏఈ పర్యాటక రంగంపై ఉన్న భారీ డిమాండ్‌ను ప్రతిబింబిస్తోందని అధికారులు పేర్కొన్నారు.

అలాగే 2025లో హోటల్ నైట్స్ సంఖ్య 10 కోట్లకు చేరడం మరో ముఖ్యమైన విజయంగా నిలిచింది. వరల్డ్ ఎకనామిక్ ఫోరం విడుదల చేసిన ట్రావెల్ అండ్ టూరిజం డెవలప్‌మెంట్ ఇండెక్స్ (TTDI) 2024లో యూఏఈ మధ్యప్రాచ్యం, ఉత్తర ఆఫ్రికా ప్రాంతాల్లో తొలి స్థానంలో నిలవగా, ప్రపంచవ్యాప్తంగా 18వ స్థానాన్ని దక్కించుకుంది.