దోహా: ఖతార్ లో ప్రైవేట్ పాఠశాలలను నియంత్రించే ముసాయిదా చట్టాన్ని “షారెక్” పబ్లిక్ కన్సల్టేషన్ వేదికపై ప్రచురించినట్లు విద్యా, ఉన్నత విద్యా మంత్రిత్వ శాఖ ప్రకటించింది. 10 రోజులలోపు అభిప్రాయాలు, సూచనలు సమర్పించవలసిందిగా ప్రజలకు పిలుపునిచ్చింది.  ఖతార్‌లో ప్రైవేట్ విద్య కోసం భవిష్యత్ నియంత్రణ ఫ్రేమ్ వర్క్ పై విద్యావేత్తలు, తల్లిదండ్రులు, పాఠశాల నిర్వాహకులు మరియు ఇతర భాగస్వాముల నుండి అభిప్రాయాలను సేకరించనున్నారు.   

ముసాయిదా చట్టంలోని ఒక కీలక నిబంధన ప్రకారం, ప్రైవేట్ పాఠశాల లైసెన్సుల కాలపరిమితిని సంబంధిత లైసెన్సింగ్ అథారిటీ నియంత్రణ ప్రమాణాలకు అనుగుణంగా నిర్ణయిస్తుంది.  దీని చెల్లుబాటు ఒక సంవత్సరం నుండి ఐదు సంవత్సరాల వరకు ఉంటుంది. 

ఈ ముసాయిదా చట్టం విద్యా నాణ్యతా ప్రమాణాలు, విద్యార్థుల సంక్షేమం మరియు ప్రైవేట్ పాఠశాలల స్థాపన, లైసెన్సింగ్ మరియు నిర్వహణను నియంత్రించే ఒక సమగ్ర ఫ్రేమ్ వర్క్ ను నిర్దేశిస్తుంది.

ప్రతిపాదిత చట్టంలోని కీలక నిబంధనలలో, ప్రైవేట్ పాఠశాలలు తమ కార్యకలాపాలను ప్రారంభించే ముందు మంత్రిత్వ శాఖలోని సమర్థ అధికారి నుండి ముందస్తు లైసెన్సింగ్ అనుమతిని పొందాలని ఈ చట్టం నిర్దేశిస్తుంది. అన్ని ట్యూషన్ ఫీజులు మరియు ఏవైనా అదనపు ఛార్జీలు తప్పనిసరిగా మంత్రిత్వ శాఖ నుండి ముందస్తు ఆమోదం పొందాలని ఇది నిర్దేశిస్తుంది.  అలాగే విద్యార్థులు లేదా తల్లిదండ్రులపై ఎలాంటి ఆమోదం లేని ఫీజులను విధించడాన్ని పాఠశాలలను నిషేధిస్తుంది.

ఈ ముసాయిదా చట్టం ఖతార్ విద్యా విధానాలు మరియు సామాజిక విలువలతో కూడిన ప్రణాళికను అందిస్తుంది. పాఠ్యప్రణాళికలు, పాఠ్యపుస్తకాలు మరియు విద్యా మెటిరియల్ మతపరమైన విలువలు, ఆచారాలు మరియు సంప్రదాయాలకు అనుగుణంగా ఉండాలని నిర్దేశిస్తుంది. అదే సమయంలో ఈ సూత్రాలకు విరుద్ధంగా భావించే ఏ పాఠ్యప్రణాళికనైనా నిలిపివేయడానికి లేదా సవరించడానికి మంత్రిత్వ శాఖకు అధికారం కల్పిస్తుంది.

ప్రతిపాదిత చట్టం ప్రకారం, ప్రైవేట్ పాఠశాలలు జాతీయ భద్రతా ప్రమాణాలకు అనుగుణంగా, వైకల్యాలు మరియు అభ్యసన లోపాలు ఉన్న విద్యార్థులకు మద్దతుతో సహా సురక్షితమైన అభ్యసన వాతావరణాన్ని అందించాలి. ఇందులో సిబ్బంది అర్హతలు, విద్యార్థుల ప్రవేశాలు, క్రమశిక్షణా విధానాలు మరియు ఆర్థిక పారదర్శకతకు సంబంధించిన నిబంధనలు కూడా ఉన్నాయి.   లైసెన్స్ లేకుండా ప్రైవేట్ పాఠశాలను నడపడం వలన రెండు సంవత్సరాల వరకు జైలు శిక్ష మరియు QR100,000 వరకు జరిమానా లేదా ఈ రెండింటిలో ఒకటి విధించబడవచ్చని మంత్రిత్వశాఖ తెలిపింది.