సీపీ ఆధ్వర్యంలో నేర సమీక్ష సమావేశం.. పెండింగ్ కేసులు, సైబర్ నేరాలు, మహిళల భద్రతపై ప్రత్యేక దృష్టి

హైదరాబాద్: సైబరాబాద్ పోలీస్ కమిషనరేట్ పరిధిలో నేరాల నియంత్రణ, పెండింగ్ కేసుల త్వరితగతిన పరిష్కారం, ట్రాఫిక్ నిర్వహణ, మహిళలు మరియు చిన్నారుల భద్రత, సైబర్ నేరాల నివారణకు ప్రాధాన్యత ఇవ్వాలని సైబరాబాద్ పోలీస్ కమిషనర్ డా.ఎం.రమేశ్, ఐపీఎస్., అధికారులను ఆదేశించారు.

సైబరాబాద్ సీపీ కార్యాలయంలోని ప్రధాన కాన్ఫరెన్స్ హాల్‌లో నిర్వహించిన నేర సమీక్ష సమావేశానికి జోనల్ డీసీపీలు, అదనపు డీసీపీలు, క్రైమ్ విభాగాల అధికారులు హాజరయ్యారు. ఈ సందర్భంగా కమిషనరేట్ పరిధిలోని వివిధ నేర కేసుల పురోగతిని సీపీ సమీక్షించారు.

సమావేశంలో పెండింగ్‌లో ఉన్న క్రిమినల్ కేసులు, కోర్టు కేసులు, పీటీ కేసులు, ఈఓడబ్ల్యూ, యూఐ కేసులు, కిడ్నాప్ కేసులు, సైబర్ క్రైమ్, పోక్సో, అత్యాచారం, హత్య కేసులు, ఇంకా ఛేదించని గ్రేవ్ కేసుల దర్యాప్తు పురోగతిపై సమగ్రంగా చర్చించారు. తీవ్రమైన నేరాల దర్యాప్తును వేగవంతం చేసి నిందితులను గుర్తించి చట్టం ముందు నిలబెట్టేందుకు అందుబాటులో ఉన్న అన్ని వనరులను వినియోగించాలని అధికారులకు సూచించారు.

మహిళల భద్రత, చిన్నారుల రక్షణకు సంబంధించిన కేసులను అత్యంత ప్రాధాన్యంతో విచారించాలని, బాధితులకు త్వరితగతిన న్యాయం అందేలా చర్యలు తీసుకోవాలని సీపీ ఆదేశించారు. జీరో ఎఫ్‌ఐఆర్ కేసుల నమోదు, ఇతర పోలీస్ స్టేషన్ల నుంచి వచ్చిన మరియు బదిలీ చేసిన కేసుల పరిష్కారాన్ని కూడా సమీక్షించారు.

డయల్-100 కాల్స్‌కు స్పందన, ఫుట్ పెట్రోలింగ్, క్షేత్రస్థాయి పోలీసింగ్, సీడీవోల విధుల నిర్వహణ, కన్విక్షన్ రేటు పెంపు వంటి అంశాలపై ప్రత్యేకంగా చర్చించారు. కేసుల దర్యాప్తు నాణ్యతను మెరుగుపరచి, కోర్టుల్లో శిక్షలు పడే శాతాన్ని పెంచేందుకు పటిష్టమైన సాక్ష్యాధారాలను సమర్పించాలని సూచించారు.

అలాగే సీసీటీఎన్ఎస్ (CCTNS) డేటా అప్‌డేషన్, ఆన్-సైట్ ఎఫ్‌ఐఆర్ విధానం అమలు, సైబర్ నేరాల దర్యాప్తు, ఆర్థిక నేరాల విచారణ, డిజిటల్ రికార్డుల నిర్వహణపై సమీక్ష నిర్వహించారు. ప్రతి కేసుకు సంబంధించిన సమాచారాన్ని సకాలంలో అప్‌డేట్ చేయాలని అధికారులను ఆదేశించారు.

డ్రగ్స్ నిర్మూలన చర్యలు, కార్మిక శిబిరాల పరిస్థితులు, పెండింగ్ నాన్-బెయిలబుల్ వారెంట్ల అమలు, లోక్ అదాలత్ ద్వారా కేసుల పరిష్కారం వంటి అంశాలు కూడా సమావేశంలో చర్చకు వచ్చాయి. ట్రాఫిక్ నిర్వహణలో భాగంగా ఐటీ కారిడార్, ప్రధాన జంక్షన్లు, రద్దీ ప్రాంతాల్లో ట్రాఫిక్ సమస్యలను తగ్గించేందుకు చేపడుతున్న చర్యలను సీపీ సమీక్షించారు.

సమావేశం ముగింపులో సీపీ డా.ఎం.రమేశ్ మాట్లాడుతూ, “ప్రజల భద్రత, ట్రాఫిక్ క్రమబద్ధీకరణ, నేరాల నియంత్రణ, బాధితులకు సత్వర న్యాయం అందించడం పోలీస్ శాఖ ప్రధాన లక్ష్యం. ప్రతి అధికారి బాధ్యతాయుతంగా వ్యవహరిస్తూ పెండింగ్ కేసుల పరిష్కారం, మహిళలు, చిన్నారుల భద్రత, సైబర్ నేరాల నియంత్రణపై ప్రత్యేక దృష్టి సారించాలి” అని సూచించారు.

ఈ సమావేశంలో అడ్మిన్ డీసీపీ టి.అన్నపూర్ణ, కుత్బుల్లాపూర్ డీసీపీ ఎన్.కోటి రెడ్డి, కూకట్‌పల్లి డీసీపీ రితిరాజ్, శేరిలింగంపల్లి డీసీపీ సీహెచ్ శ్రీనివాస్, ట్రాఫిక్ డీసీపీ శేషాద్రిని రెడ్డి, క్రైమ్స్ డీసీపీ ముత్యం రెడ్డి, స్పెషల్ బ్రాంచ్ డీసీపీ వైవీఎస్ సుధీంద్ర, డబ్ల్యూ అండ్ సీఎస్‌డబ్ల్యూ డీసీపీ సృజన కరణం, సైబర్ క్రైమ్స్ డీసీపీ టి.సాయి మనోహర్, ఎస్ఓటీ డీసీపీ శోభన్ కుమార్, సీఏఆర్ హెడ్‌క్వార్టర్స్ డీసీపీ సంజీవ్‌తో పాటు పలువురు ఏడీసీపీలు, ఏసీపీలు, ఎస్‌హెచ్‌వోలు పాల్గొన్నారు.