రియాద్: ప్రివెన్షన్ మరియు పబ్లిక్ హెల్త్  విషయంలో సౌదీ అరేబియా తన 2030 లక్ష్యాన్ని ముందుగానే సాధించింది. సౌదీ వ్యాప్తంగా ఉన్న ఆరోగ్య విభాగాలు ఆరోగ్య ప్రమాదాలను పరిష్కరించడానికి 92 శాతం సంసిద్ధతను సాధించాయి. ఈ విషయాన్ని ఆరోగ్య రంగ పరివర్తన కార్యక్రమం 2025 వార్షిక నివేదికలో వెల్లడించారు.

సౌదీ విజన్ 2030 ప్రారంభించినప్పటి నుండి ఆరోగ్య రంగంలో ముఖ్యమైన విజయాలను ఈ నివేదిక వెల్లడించింది. మానవ ఆరోగ్యానికి ప్రాధాన్యతనిచ్చే మరింత సమగ్రమైన, సమర్థవంతమైన ఆరోగ్య సంరక్షణ వ్యవస్థను నిర్మించడంలో నిరంతర పురోగతిని ఇది తెలిపింది. 

సౌదీలో సగటు ఆయుర్దాయం 79.7 సంవత్సరాలకు పెరిగిందని, ఇది విజన్ యొక్క 80 సంవత్సరాల లక్ష్యానికి చేరువవుతోందని కూడా ఈ నివేదిక సూచించింది. ఆరోగ్యకరమైన జీవనశైలిని ప్రోత్సహించడం, ఆరోగ్య సంరక్షణ సేవలను అభివృద్ధి చేయడంలో జాతీయ ప్రయత్నాల నేపథ్యంలో ఇది సాధ్యమైందని పేర్కొంది. 

సౌదీలోని మారుమూల ప్రాంతాలతో సహా 97.5 శాతం జనావాస కేంద్రాలకు ప్రాథమిక ఆరోగ్య సంరక్షణ సేవలు అందుతున్నాయి. ఆరోగ్య సంరక్షణలో డిజిటల్ పరివర్తన విషయానికి వస్తే, సెహతీ అప్లికేషన్ యొక్క లబ్ధిదారుల సంఖ్య 3.1 కోట్లకు పైగా ఉండగా, సెహా వర్చువల్ హాస్పిటల్ సేవలు ఈ వ్యవస్థకు అనుసంధానించబడిన 241 ఆరోగ్య సంరక్షణ కేంద్రాల నెట్‌వర్క్ ద్వారా 3,65,000 కంటే ఎక్కువ మంది లబ్ధిదారులకు విస్తరించింది.  

ఈ నివేదిక జాతీయ ఆరోగ్య సంరక్షణ సామర్థ్యాలలో పెట్టుబడులను కూడా హైలైట్ చేసింది. రాజ్యంలో ఆరోగ్య సంరక్షణ నిపుణుల సంఖ్య 8,03,000 దాటగా, సౌదీ బోర్డ్ కార్యక్రమాల నుండి 35,000 మందికి పైగా వైద్యులు పట్టభద్రులయ్యారు. ఇది ఆరోగ్య సంరక్షణ సేవల నాణ్యతకు మద్దతు ఇస్తుందని,  భవిష్యత్ అవసరాలను తీర్చడానికి ఈ రంగం సంసిద్ధతను పెంచుతుందని నివేదిక స్పష్టం చేసింది. ప్రభుత్వ సంస్థల మధ్య మెరుగైన సమన్వయ ప్రయత్నాల కారణంగా ట్రాఫిక్ మరణాలు సుమారు 60 శాతం తగ్గాయని నివేదిక వెల్లడించింది.