న్యూ ఢిల్లీ: విదేశాలకు వెళ్లాలనుకునే భారతీయులకు కేంద్ర ప్రభుత్వం పెద్ద షాక్ ఇచ్చింది. పాస్‌పోర్ట్ జారీ ప్రక్రియకు సంబంధించిన వివిధ రకాల రుసుములను కేంద్ర విదేశాంగ మంత్రిత్వ శాఖ (MEA) గణనీయంగా పెంచింది. జూన్ 20న ఇందుకు సంబంధించిన గెజిట్ నోటిఫికేషన్‌ను ప్రభుత్వం విడుదల చేసింది. సుదీర్ఘ విరామం తర్వాత, పాస్‌పోర్ట్ సేవల నిర్వహణ వ్యయం పెరగడం వల్లే ఈ నిర్ణయం తీసుకోవాల్సి వచ్చిందని అధికారులు తెలిపారు. ఈ పెరిగిన కొత్త ధరలు 2026, జూలై 1 నుంచి అధికారికంగా అమలులోకి రానున్నాయి.

సాధారణ, తత్కాల్ కేటగిరీల కొత్త ధరల వివరాలు
తాజా సవరణల ప్రకారం, సాధారణ కేటగిరీలో పెద్దలు తీసుకునే 36 పేజీల పాస్‌పోర్ట్ రుసుము రూ.1,500 నుంచి రూ.2,500కి (67 శాతం పెంపు) పెరిగింది. అదేవిధంగా, ఎక్కువ ప్రయాణాలు చేసే వారికి ఉపయోగపడే 60 పేజీల పాస్‌పోర్ట్ ఫీజు రూ.2,000 నుండి ఏకంగా రూ.3,500కి (75 శాతం పెంపు) చేరింది. ఒకవేళ అత్యవసరంగా తత్కాల్ విధానంలో పాస్‌పోర్ట్ పొందాలనుకుంటే.. 36 పేజీల దానికి రూ.5,000, 60 పేజీల దానికి రూ.6,000 చెల్లించాల్సి ఉంటుంది. ఇక 18 ఏళ్లలోపు ఉన్న మైనర్ల విషయానికి వస్తే, వారి 36 పేజీల పాస్‌పోర్ట్ ఫీజును రూ.1,750గా నిర్ణయించారు.

పాస్‌పోర్ట్ రీప్లేస్‌మెంట్, పీసీసీ చార్జీల పెంపు

ఒకవేళ పాస్‌పోర్ట్ పోగొట్టుకున్నా లేదా అది పాడైపోయినా.. ప్రత్యామ్నాయంగా కొత్తది (రీప్లేస్‌మెంట్) పొందేందుకు అయ్యే ఖర్చులను కూడా ప్రభుత్వం భారీగా పెంచింది. సాధారణ పద్ధతిలో 36 పేజీల డూప్లికేట్ పాస్‌పోర్ట్ కోసం రూ.5,000, 60 పేజీల కోసం రూ.6,000 కట్టాలి. ఒకవేళ ఇదే సేవను తత్కాల్ విధానంలో వేగంగా పొందాలంటే వరుసగా రూ.7,500 మరియు రూ.8,500 వరకు జేబుకు చిల్లు పెట్టుకోవాల్సిందే. వీటితో పాటు విదేశీ ఉద్యోగాల కోసం అవసరమయ్యే పోలీస్ క్లియరెన్స్ సర్టిఫికెట్ (PCC) ఫీజును కూడా రూ.750గా ఖరారు చేశారు.

కాలపరిమితిలో మార్పు లేదు.. జూలై 1 నుంచి కొత్త అప్‌డేట్
ప్రస్తుతానికి అధికారిక పాస్‌పోర్ట్ సేవా పోర్టల్‌లో పాత ధరలే కనిపిస్తున్నప్పటికీ, జూలై 1వ తేదీ నుంచి ఆటోమేటిక్‌గా కొత్త రుసుములు వర్తిస్తాయని అధికారులు స్పష్టం చేశారు. అయితే, ఫీజులు పెరిగినప్పటికీ పాస్‌పోర్ట్ చెల్లుబాటు కాలపరిమితి (వాలిడిటీ) లో మాత్రం ఎలాంటి మార్పులు చేయలేదు. గతంలో ఉన్న నియమాల ప్రకారమే పెద్దలకు 10 సంవత్సరాలు, మైనర్లకు 5 సంవత్సరాల పాటు పాస్‌పోర్ట్ కాలపరిమితి కొనసాగుతుంది.