హైదరాబాద్: కల్వకుంట్ల కవిత టీఆర్ఎస్ పేరు మార్పు తప్పదని కేంద్ర ఎన్నికల సంఘం తాజాగా ఆదేశాలు జారీ చేసింది. కవిత స్థాపించిన తెలంగాణ రక్షణ సేన పేరుపై ప్రజల నుంచి పెద్ద ఎత్తున అభ్యంతరాలు రావడంతో ఈసీ ఈ నిర్ణయం తీసుకుంది. పాత టీఆర్ఎస్ పేరుతో ఈ పార్టీని కొనసాగించడం వల్ల ఓటర్లలో గందరగోళం ఏర్పడుతుందని ఫిర్యాదులు అందాయి. ఈ నేపథ్యంలో ఎన్నికల కమిషన్ ఈ పేరును అంగీకరించేది లేదని స్పష్టం చేసింది. రాజకీయంగా ఈ పరిణామం కవితకు పెద్ద షాక్ అనే చెప్పాలి. ఇప్పుడు కవిత ముందున్న ఏకైక మార్గం పార్టీ పేరును మార్చుకోవడమే.

15 రోజుల్లో కొత్త పేర్లు ప్రతిపాదించాలి

పార్టీ పేరు మార్చుకోవాలని ఈసీ పంపిన లేఖలో కీలక హెచ్చరికలు ఉన్నాయి. 15 రోజుల్లోపు మూడు ప్రత్యామ్నాయ పేర్లను కమిషన్‌కు సమర్పించాలని కవితకు సూచించింది. ఒకవేళ నిర్ణీత గడువులోగా కొత్త పేర్లను పంపకపోతే, ఎలాంటి ముందస్తు సమాచారం ఇవ్వకుండానే పార్టీ రిజిస్ట్రేషన్ దరఖాస్తును క్లోజ్ చేస్తామని స్పష్టం చేసింది. గతంలో పేరు మార్పు వద్దని కవిత ఈసీకి సమాధానం పంపినప్పటికీ, కమిషన్ మాత్రం అభ్యంతరాలను పరిగణనలోకి తీసుకుంది. పార్టీ గుర్తింపు విషయంలో కమిషన్ కఠినంగా వ్యవహరిస్తుండటంతో, కవిత తదుపరి నిర్ణయంపై తీవ్ర ఉత్కంఠ నెలకొంది.

న్యాయ సలహాల బాటలో కవిత

ఈసీ లేఖతో కవిత తన న్యాయ నిపుణులతో సంప్రదింపులు జరుపుతున్నట్లు సమాచారం. పేరు మార్చాలా లేదా మరోసారి కమిషన్‌ను ఒప్పించే ప్రయత్నం చేయాలా అనే అంశంపై చర్చలు సాగుతున్నాయి.తెలంగాణ రాజ్య సమితి, తెలంగాణ రాష్ట్ర సామాజిక సేన వంటి సంస్థలు కూడా ఈ పేరుపై అభ్యంతరం చెప్పడం చర్చకు దారితీసింది. పేరు మార్పు విషయంలో కవిత ఎటువంటి నిర్ణయం తీసుకుంటారో తెలియాలంటే మరికొన్ని రోజులు వేచి చూడాలి. ప్రస్తుతం ఈ వ్యవహారం తెలంగాణ రాజకీయాల్లో హాట్ టాపిక్‌గా మారింది. ఈసీ నిర్ణయం రాజకీయంగా ఎలాంటి ప్రభావం చూపుతుందో చూడాలి.