రాష్ట్రానికి భారీగా పెట్టుబడులను, పారిశ్రామికాభివృద్ధిని తీసుకురావడమే ధ్యేయంగా ఆంధ్రప్రదేశ్ ఐటీ, ఎలక్ట్రానిక్స్ శాఖల మంత్రి నారా లోకేష్ దక్షిణ కొరియాలో విస్తృతంగా పర్యటిస్తున్నారు. ఇందులో భాగంగా సియోల్ నగరంలో అంతర్జాతీయ దిగ్గజ కంపెనీల అధినేతలు, ప్రతినిధులతో ఆయన వరుసగా సమావేశమవుతున్నారు. ఆంధ్రప్రదేశ్‌లో పెట్టుబడులు పెట్టడానికి ఉన్న అనుకూల వాతావరణాన్ని వివరిస్తూ, ఇక్కడ పరిశ్రమల స్థాపనకు ముందుకు రావాలని ఆయన ఆహ్వానిస్తున్నారు.

ఎల్జీ ప్రతినిధులతో భేటీ: కాకినాడ, మూలపేట, వైజాగ్ లలో ప్రాజెక్టులపై ప్రతిపాదనలు
సియోల్‌ పర్యటనలో భాగంగా ఎల్జీ కెమ్ గ్లోబల్ స్ట్రాటజీ సెంటర్ ప్రెసిడెంట్ యున్-జు కోహ్‍తో మంత్రి లోకేష్ ప్రత్యేకంగా సమావేశమయ్యారు. ఏపీలోని కాకినాడ పోర్టు పరిసర ప్రాంతాల్లో పాలీస్టైరిన్ ఉత్పాదక కేంద్రాన్ని, అలాగే మూలపేటలో అంతర్జాతీయ స్థాయి నాఫ్తా క్రాకర్ యూనిట్‌ను ఏర్పాటు చేసే అవకాశాలను పరిశీలించాలని ఆయన కోరారు. దీనితో పాటు, ఎల్జీ ఎలక్ట్రానిక్స్ గ్లోబల్ సీఈవో ల్యూ జె చెయోల్‌తో భేటీ అయి.. విశాఖపట్నం వేదికగా ఒక అత్యాధునిక ఇంజనీరింగ్ సెంటర్‌ను నిర్మించాలని విజ్ఞప్తి చేశారు.

హ్యుందాయ్, శాంసంగ్ సంస్థలతో చర్చలు: ఏపీలో ఈవీ, డేటా సెంటర్ల హబ్

అనంతరం హ్యుందాయ్ మోబిస్ ఎగ్జిక్యూటివ్ వైస్ ప్రెసిడెంట్ యంగ్ బిన్ కిమ్‌తో సమావేశమైన లోకేష్.. ఆంధ్రప్రదేశ్‌ను ఎలక్ట్రిక్ వెహికల్ (EV) సెమీకండక్టర్ల హబ్‌గా మార్చే ప్రాజెక్టులో భాగస్వాములు కావాలని కోరారు. అదేవిధంగా, ప్రముఖ ఎలక్ట్రానిక్స్ దిగ్గజం శాంసంగ్ ప్రతినిధులతో జరిగిన భేటీలో.. భారతదేశంలో డేటా సెంటర్లు మరియు సర్వర్ల తయారీకి ఆంధ్రప్రదేశ్‌ను ప్రధాన స్థావరంగా (హబ్) ఎంచుకోవాలని లోకేష్ ప్రతిపాదించారు.

క్వాంటమ్ టెక్నాలజీలో ఏపీని నెంబర్ వన్ చేయడమే లక్ష్యం!
భారతదేశంలోనే క్వాంటమ్ టెక్నాలజీ రంగానికి ఆంధ్రప్రదేశ్‌ను కేరాఫ్ అడ్రస్‌గా నిలబెట్టడమే తమ ప్రభుత్వ ప్రధాన లక్ష్యమని మంత్రి లోకేష్ ఈ సందర్భంగా స్పష్టం చేశారు. రాష్ట్రంలో 150 క్యూబిట్‌ల (150 Qubits) సామర్థ్యం గల క్వాంటమ్ కంప్యూటర్ ఏర్పాటు చేయడంతో పాటు, భవిష్యత్తులో దాని తయారీ రంగాన్ని కూడా అభివృద్ధి చేసేందుకు ఒక పక్కా ప్రణాళికతో ముందుకు సాగుతున్నామని వివరించారు. కాగా, ఈ బిజీ పర్యటనలో భాగంగా ఎల్జీ సైన్స్ పార్క్‌ను సందర్శించిన లోకేష్, అక్కడ ఒక హ్యూమనాయిడ్ రోబోతో సరదాగా దిగిన ఫోటో సామాజిక మాధ్యమాల్లో ఆకట్టుకుంటోంది.