ఇరాన్‌ పై అమెరికా జరిపిన దాడుల్లో ఏడుగురు ఇరాన్ సైనికులు మృతి చెందినట్లు సమాచారం. ఇరాన్ ఆర్మీ తెలిపిన వివరాల ప్రకారం.. బుధవారం తెల్లవారుజామున బంపూర్‌లోని సైనిక స్థావరంపై అమెరికా దాడులు చేసింది. ఈ ఘటనలో ఏడుగురు సిబ్బంది ప్రాణాలు కోల్పోయినట్లు సెమీ-అఫీషియల్ వార్తా సంస్థ టాస్నిమ్ తెలిపింది.

దాడుల్లో గరిష్ఠ ప్రాణనష్టం కలిగించడమే లక్ష్యంగా పెట్టుకున్నట్లు ఇరాన్ సైన్యం ఆరోపించింది. మొత్తం 13 క్షిపణులు దక్షిణ ఇరాన్‌లోని ఇరాన్‌షహర్ నగర సమీపంలోని సైనిక స్థావరంపై పడ్డాయని పేర్కొంది. ఈ దాడుల్లో గెస్ట్‌హౌస్, గార్డు పోస్టులు, సైనికుల నివాస సదుపాయాలు దెబ్బతిన్నట్లు తెలిపింది.

ఈ ఘటనలో పలువురు సైనికులు గాయపడినట్లు ఇరాన్ ఆర్మీ వెల్లడించింది. అమెరికా దాడికి “నిర్ణయాత్మక ప్రతిస్పందన” ఇస్తామని ఇరాన్ సైన్యం హెచ్చరించింది.