పశ్చిమాసియాలోని గల్ఫ్ ప్రాంతంలో నెలకొన్న భద్రతా ఉద్రిక్తతలు తారాస్థాయికి చేరాయి. అత్యంత సున్నితమైన ప్రాంతంగా పరిగణించే హర్మూజ్ జలసంధి సమీపంలోని ఇరాన్ ప్రాదేశిక జలాల్లో ప్రయాణిస్తున్న ఒక ఎల్‌పీజీ (LPG) ట్యాంకర్‌పై క్షిపణి దాడి జరగడం అంతర్జాతీయంగా తీవ్ర సంచలనం సృష్టించింది. మొజాంబిక్ జెండాతో ప్రయాణిస్తున్న ‘దిశ’ అనే ఈ నౌకలో మొత్తం 28 మంది భారతీయ నావికులు సిబ్బందిగా ఉన్నారు. అయితే, ఈ ప్రమాదకర దాడి నుంచి భారతీయ సిబ్బంది అందరూ ప్రాణాలతో బయటపడటంతో అందరూ ఊపిరి పీల్చుకున్నారు. నౌకలోని నావికులంతా సురక్షితంగా ఉన్నట్లు ఇరాన్‌లోని భారత రాయబార కార్యాలయం అధికారికంగా వెల్లడించింది.

తక్షణమే స్పందించిన భారత రాయబార కార్యాలయం

ఘటన గురించి సమాచారం అందిన వెంటనే ఇరాన్‌లోని భారత ఎంబసీ అధికారులు అప్రమత్తమయ్యారు. స్థానిక ఇరాన్ ప్రభుత్వ అధికారులతో ఎల్లప్పుడూ సంప్రదింపులు జరుపుతూ, పరిస్థితిని ఎప్పటికప్పుడు సమీక్షిస్తున్నామని రాయబార కార్యాలయం స్పష్టం చేసింది. నావికుల భద్రతను అత్యంత ప్రాధాన్యతాంశంగా తీసుకుని, వారికి అవసరమైన అన్ని రకాల సహాయ సహకారాలు అందించేందుకు దౌత్యపరమైన చర్యలు ముమ్మరం చేసినట్లు తెలిపారు.

అమెరికా హెచ్చరికలు.. ఆపై ఊహించని డిస్ట్రెస్ కాల్

ఈ దాడి వెనుక ఆసక్తికరమైన మరియు కలవరపెట్టే పరిణామాలు చోటుచేసుకున్నట్లు విదేశీ రేడియో కథనాలు పేర్కొంటున్నాయి. అమెరికా మిలిటరీ ఆపరేటర్లు సదరు నౌకను ఇరాన్ జలాల వైపు వెళ్లవద్దని, ఒకవేళ ఆ దిశగా వెళ్తే నౌక ఇంజిన్ రూమ్‌పై దాడి చేస్తామని హెచ్చరించినట్లు చెబుతున్న ఆడియో రికార్డింగ్‌లు బయటపడటం గమనాార్హం. ఈ హెచ్చరికలు ముగిసిన కొద్దిసేపటికే.. తమ నౌకపై గుర్తుతెలియని క్షిపణులు పడ్డాయని, అత్యవసరంగా రక్షణ సహాయం కావాలంటూ ‘దిశ’ నౌక నుంచి ‘డిస్ట్రెస్ కాల్’ (Distress Call) రావడం గల్ఫ్ ప్రాంతంలో నెలకొన్న ప్రమాదకర పరిస్థితులకు అద్దం పడుతోంది.

ముందే హెచ్చరించిన డైరెక్టరేట్ జనరల్ ఆఫ్ మేరిటైమ్ అడ్మినిస్ట్రేషన్ (DGMA)

మధ్యప్రాచ్యంలో రాజుకుంటున్న ఉద్రిక్తతల తీవ్రతను ముందే గ్రహించిన డైరెక్టరేట్ జనరల్ ఆఫ్ మేరిటైమ్ అడ్మినిస్ట్రేషన్ (DGMA) కీలక ఆదేశాలు జారీ చేసింది. తదుపరి ఉత్తర్వులు వచ్చే వరకు హర్మూజ్ జలసంధి గుండా వెళ్లే నౌకల్లో ఏ ఒక్క భారతీయ సీఫేరర్‌ను (నావికుడిని) నియమించవద్దని నౌకాయాన సంస్థలను ఇటీవలే హెచ్చరించింది. భారతీయ నావికుల రక్షణే ధ్యేయంగా ఈ నిర్ణయం తీసుకున్నప్పటికీ, ఈ లోపే ఈ క్షిపణి దాడి జరగడం మేరిటైమ్ రంగంలో తీవ్ర ఆందోళన కలిగిస్తోంది.