అమరావతి: వినాయక చవితి పర్వదినం సందర్భంగా ఆంధ్రప్రదేశ్‌ ప్రజలకు రాష్ట్ర గవర్నర్‌ ఎస్‌. అబ్దుల్‌ నజీర్‌ హృదయపూర్వక శుభాకాంక్షలు తెలిపారు. సెప్టెంబర్‌ 14న వినాయక చవితిని భక్తిశ్రద్ధలతో జరుపుకోనున్న ప్రజలకు ఆయన శుభాకాంక్షలు తెలియజేశారు.

కుటుంబ సభ్యులందరూ కలిసి ఉత్సాహం, భక్తిభావం, ఆనందోత్సాహాలతో జరుపుకునే ముఖ్యమైన పండుగ వినాయక చవితి అని గవర్నర్‌ పేర్కొన్నారు. విఘ్నేశ్వరుడిని ఆరాధించడం ద్వారా అడ్డంకులు తొలగి, సుఖసంతోషాలు, ఐశ్వర్యం కలుగుతాయని భక్తులు విశ్వసిస్తారని తెలిపారు.

నూతన కార్యాలు విజయవంతం కావాలని కోరుతూ వినాయకుడిని పూజించడం ఆనవాయితీగా వస్తోందని గవర్నర్‌ అన్నారు. ఈ పవిత్ర పర్వదినం సందర్భంగా ప్రజలందరూ శాంతి, సౌభాగ్యం, సామరస్యంతో కూడిన జీవితాన్ని గడిపేలా విఘ్నేశ్వరుడు తన ఆశీస్సులు అందించాలని ఆకాంక్షించారు.