దోహా: ఖతార్‌లో కొత్త వ్యాపారాలను ప్రారంభించాలనుకునే పెట్టుబడిదారులు, పారిశ్రామికవేత్తలకు మరింత సౌకర్యం కల్పించేలా వాణిజ్య, పరిశ్రమల మంత్రిత్వ శాఖ (MoCI) 'బిజినెస్ గైడెన్స్ అండ్ ఎస్టాబ్లిష్‌మెంట్ ఆఫీస్'ను ప్రారంభించింది. వ్యాపార నమోదు ప్రక్రియను సులభతరం చేయడంతో పాటు, పెట్టుబడిదారులకు అవసరమైన మార్గదర్శకత్వాన్ని ఒకే చోట అందించడం ఈ కేంద్రం ప్రధాన ఉద్దేశమని తెలిపింది.

కాగా, వ్యాపార వర్గాలు ఈ నిర్ణయాన్ని స్వాగతించాయి. ముఖ్యంగా తొలిసారిగా వ్యాపారం ప్రారంభించే యువ పారిశ్రామికవేత్తలు, విదేశీ పెట్టుబడిదారులకు ఈ కేంద్రం ఎంతో ఉపయోగపడుతుందని పేర్కొన్నారు. కంపెనీల స్థాపనకు అవసరమైన నిబంధనలు, లైసెన్సులు, అనుమతులపై స్పష్టమైన సమాచారం లభించడం వల్ల అనవసర జాప్యాలు తగ్గుతాయని అభిప్రాయపడ్డారు.

ఖతార్‌లో పెట్టుబడుల అవకాశాలను పరిశీలిస్తున్న విదేశీ పెట్టుబడిదారులు కూడా ఈ నిర్ణయాన్ని స్వాగతించారు. ఒకే కేంద్రం ద్వారా ఖచ్చితమైన సమాచారం లభించడం వల్ల నిర్ణయాలు వేగంగా తీసుకునే అవకాశం ఉంటుందని, పెట్టుబడులపై విశ్వాసం మరింత పెరుగుతుందని తెలిపారు.

దోహాకు చెందిన పలువురు పారిశ్రామికవేత్తలు మాట్లాడుతూ..  స్టార్టప్‌లకు ఈ కేంద్రం ఎంతో మేలు చేస్తుందని పేర్కొన్నారు. వ్యాపారం ప్రారంభించే ప్రక్రియలో ఎదురయ్యే సందేహాలను నిపుణుల సహాయంతో పరిష్కరించుకోవడం వల్ల వ్యాపార అభివృద్ధిపై ఎక్కువ దృష్టి పెట్టే అవకాశం ఉంటుందని తెలిపారు.

ఈ కార్యక్రమం ద్వారా ఖతార్ ప్రభుత్వం పారిశ్రామికవేత్తలను ప్రోత్సహించడం, ప్రైవేట్ రంగ భాగస్వామ్యాన్ని పెంచడం, దేశీయ, విదేశీ పెట్టుబడులను మరింత ఆకర్షించడం లక్ష్యంగా పెట్టుకుంది. లుసైల్‌లో ఏర్పాటు చేసిన బిజినెస్ గైడెన్స్ అండ్ ఎస్టాబ్లిష్‌మెంట్ ఆఫీస్ ను సందర్శించి కంపెనీ స్థాపనకు సంబంధించిన పూర్తి మార్గదర్శకత్వం, సేవలను పొందాలని పెట్టుబడిదారులు, పారిశ్రామికవేత్తలకు వాణిజ్య, పరిశ్రమల మంత్రిత్వ శాఖ సూచించింది.