చెన్నై: తమిళనాడు సినీ పరిశ్రమకు ముఖ్యమంత్రి విజయ్ కీలక శుభవార్త అందించారు. రాష్ట్రంలోని సినిమా థియేటర్లలో అదనపు షోలకు అనుమతిస్తూ నిర్ణయం తీసుకున్నారు. సినిమా విడుదలైన తేదీ నుంచి వరుసగా వారం రోజుల పాటు రోజుకు ఆరు షోలు ప్రదర్శించుకునేందుకు అవకాశం కల్పించారు. ఉదయం 6 గంటల నుంచి అర్ధరాత్రి 2.30 గంటల వరకు సినిమాలను ప్రదర్శించుకోవచ్చని అనుమతి ఇచ్చారు. గతంలో రోజుకు నాలుగు షోలకు మాత్రమే అనుమతి ఉండటంతో సినీ నిర్మాతలు, డిస్ట్రిబ్యూటర్లు, థియేటర్ల యాజమాన్యాలు ఇబ్బందులు ఎదుర్కొనేవి. 2023లో స్టార్ హీరో అజిత్ నటించిన ‘తునివు’ సినిమా విడుదల సందర్భంగా థియేటర్ వద్ద జరిగిన తొక్కిసలాట ఘటన నేపథ్యంలో ప్రభుత్వం అదనపు షోలపై ఆంక్షలు విధించింది. అప్పటి నుంచి రోజుకు నాలుగు షోలకు మాత్రమే అనుమతిస్తూ వస్తున్నారు. తాజాగా సీఎం విజయ్ ఈ నిబంధనలను సడలించడంతో తమిళ సినీ పరిశ్రమలో కొత్త ఉత్సాహం నెలకొంది.

దీపావళి సినిమాలకు కలిసిరానున్న నిర్ణయం
సీఎం విజయ్ తీసుకున్న ఈ నిర్ణయం రాబోయే భారీ చిత్రాల విడుదలకు ప్రయోజనకరంగా మారనుంది. ముఖ్యంగా దీపావళి సందర్భంగా విడుదల కానున్న ‘సీన్’, ‘రామాయణ’ సినిమాలకు అదనపు షోల అనుమతి ప్లస్ పాయింట్‌గా నిలవనుంది. రోజుకు ఆరు షోలు ప్రదర్శించే అవకాశం ఉండటంతో ఎక్కువ మంది ప్రేక్షకులు తమకు అనుకూలమైన సమయాల్లో సినిమాలను వీక్షించేందుకు వీలవుతుంది. అలాగే థియేటర్లలో టికెట్లకు ఉండే డిమాండ్‌ను కొంతవరకు తగ్గించడంతో పాటు సినిమా వసూళ్లకు కూడా ఈ నిర్ణయం దోహదపడే అవకాశం ఉంది. మరోవైపు అదనపు షోల నిర్వహణలో ప్రేక్షకుల భద్రతకు తగిన ఏర్పాట్లు చేయడం కూడా కీలకం కానుంది. మొత్తంగా తమిళనాడు ప్రభుత్వం తీసుకున్న తాజా నిర్ణయం సినీ పరిశ్రమకు ఊరటనివ్వడంతో పాటు పండగ సీజన్‌లో థియేటర్ల సందడిని మరింత పెంచనుంది.