హైదరాబాద్: దేశవ్యాప్తంగా పెరుగుతున్న సైబర్ నేరాలను సమర్థవంతంగా అరికట్టేందుకు రాష్ట్రాల మధ్య సమన్వయం, ఉమ్మడి కార్యాచరణ అత్యంత కీలకమని తెలంగాణ డీజీపీ సీ.వి. ఆనంద్, ఐపీఎస్ పేర్కొన్నారు. హైదరాబాద్‌లోని తెలంగాణ ఇంటిగ్రేటెడ్ కమాండ్ అండ్ కంట్రోల్ సెంటర్ (TGICCC)లో తెలంగాణ సైబర్ సెక్యూరిటీ బ్యూరో ఆధ్వర్యంలో నిర్వహించిన జాయింట్ సైబర్ క్రైమ్ కోఆర్డినేషన్ టీమ్ (JCCT-IV) సదస్సును ఆయన ప్రారంభించారు.

ఈ సందర్భంగా డీజీపీ మాట్లాడుతూ.. దేశవ్యాప్తంగా సైబర్ నేరాల నియంత్రణలో వివిధ రాష్ట్రాల పోలీసు వ్యవస్థల మధ్య సమన్వయాన్ని బలోపేతం చేసేందుకు కేంద్ర హోం మంత్రిత్వ శాఖ (MHA) ఏడు ప్రాంతీయ జాయింట్ సైబర్ క్రైమ్ కోఆర్డినేషన్ టీమ్‌లను ఏర్పాటు చేసిందని తెలిపారు.

సైబర్ నేరాల నియంత్రణలో తెలంగాణ సాధించిన పురోగతిని ఈ సందర్భంగా డీజీపీ వివరించారు. ప్రధానమంత్రి కార్యాలయం ఇటీవల నిర్వహించిన సమీక్షల్లో సైబర్ నేరాల నియంత్రణలో తెలంగాణ దేశంలోనే మొదటి స్థానాన్ని సాధించిన విషయాన్ని ప్రస్తావించారు. సైబర్ మోసాలకు గురైన బాధితులకు వారి డబ్బును తిరిగి ఇప్పించడంతోపాటు, మోసాలు జరగకముందే వాటిని అడ్డుకోవడం, నేరాలకు పాల్పడుతున్న నెట్‌వర్క్‌లను పూర్తిస్థాయిలో ఛేదించడంపై పోలీసులు ప్రత్యేక దృష్టి సారించాలని సూచించారు.

డిజిటల్ అరెస్ట్ మోసాలపై సుప్రీంకోర్టు చేసిన కీలక వ్యాఖ్యలను కూడా ఆయన ప్రస్తావించారు. సైబర్ నేరాలను అరికట్టేందుకు బ్యాంకింగ్, టెలికాం, భద్రత, కార్పొరేట్ బాధ్యత, డిజిటల్ మౌలిక సదుపాయాలు, అంతర్జాతీయ సహకారం వంటి ఆరు కీలక రంగాలకు సంబంధించి తెలంగాణ రూపొందించిన 52 సిఫార్సులను వివరించారు.

ఈ సదస్సులో I4C సీఈఓ రాజేష్‌తో పాటు ఆయన బృందం, JCCT-IV పరిధిలోని వివిధ రాష్ట్రాల పోలీసు అధికారులు, ప్రత్యేకంగా ఆహ్వానించిన ఆరు రాష్ట్రాల ప్రతినిధులు, పలు కీలక జాతీయ దర్యాప్తు సంస్థల అధికారులు పాల్గొన్నారు.

సైబర్ నేరాల నివారణ, రాష్ట్రాల మధ్య సమాచార మార్పిడి, ఉమ్మడి పోలీసు ఆపరేషన్లు, మహిళలు మరియు పిల్లలపై జరుగుతున్న ఆన్‌లైన్ నేరాల నియంత్రణ, కృత్రిమ మేధ (AI) ఆధారంగా సైబర్ నేరాలను గుర్తించడం, సంబంధిత సంస్థల జవాబుదారీతనం వంటి అంశాలపై సదస్సులో విస్తృతంగా చర్చించారు.

దేశవ్యాప్తంగా సైబర్ నేరాలను మరింత సమన్వయంతో, సమర్థవంతంగా ఎదుర్కొనేందుకు అవసరమైన ఉమ్మడి కార్యాచరణ వ్యూహాన్ని రూపొందించడంలో ఈ సదస్సు కీలకంగా నిలుస్తుందని డీజీపీ సీ.వి. ఆనంద్ ఆశాభావం వ్యక్తం చేశారు.