కన్నూర్: సౌదీ అరేబియాలో హత్య కేసులో జైలు శిక్ష అనుభవించి, రూ.80 లక్షల "బ్లడ్ మనీ" చెల్లింపు తర్వాత భారత్‌కు తిరిగి వచ్చిన కేరళలోని కన్నూర్ జిల్లాకు చెందిన వ్యక్తి, అంతర్రాష్ట్ర మాదకద్రవ్యాల అక్రమ రవాణా ముఠాకు సూత్రధారిగా వ్యవహరించిన ఆరోపణలపై అరెస్టయ్యాడు.

పోలీసుల వివరాల ప్రకారం, కన్నూర్ జిల్లా కరికొట్టక్కరి ప్రాంతానికి చెందిన ఫజలుద్దీన్ టి. (45)ను జూలై 14న పోలీసులు అరెస్టు చేశారు. బెంగళూరు నుంచి కేరళకు మెథాంఫెటమైన్ (Methamphetamine) సహా ఇతర సింథటిక్ మాదకద్రవ్యాలను సరఫరా చేస్తున్న నెట్‌వర్క్‌కు అతడే ప్రధాన సూత్రధారి అని దర్యాప్తులో తేలినట్లు పోలీసులు వెల్లడించారు.

సౌదీలో హత్య కేసు..10 ఏళ్ల జైలు శిక్ష

2006లో సౌదీ అరేబియాలో టాక్సీ డ్రైవర్‌గా పనిచేస్తున్న సమయంలో మంగళూరుకు చెందిన 23 ఏళ్ల అష్రఫ్ హత్య కేసులో ఫజలుద్దీన్‌కు జైలు శిక్ష పడింది. దాదాపు పదేళ్ల శిక్ష అనుభవించిన అనంతరం, స్వచ్ఛంద సంస్థల సహకారంతో రూ.80 లక్షల బ్లడ్ మనీ చెల్లించడంతో ఆయన భారత్‌కు తిరిగి వచ్చినట్లు పోలీసులు తెలిపారు.

బెంగళూరులో గంజాయి కేసు

2023లో బెంగళూరులో ఓ టీ దుకాణంలో పనిచేస్తున్న సమయంలో 50 కిలోల గంజాయిని కలిగి ఉండటం, విక్రయించడం వంటి ఆరోపణలపై బెంగళూరు పోలీసులు అతడిని అరెస్టు చేశారు. ఈ కేసులో మూడు సంవత్సరాలు బెంగళూరు జైలులో గడిపిన అనంతరం ఈ ఏడాది జనవరిలో విడుదలయ్యాడు.

జైలులోనే డ్రగ్స్ ముఠాతో పరిచయాలు

జైలు శిక్ష అనుభవిస్తున్న సమయంలోనే ఫజలుద్దీన్ పెద్ద డ్రగ్స్ సిండికేట్ సభ్యులతో పరిచయాలు పెంచుకున్నట్లు పోలీసులు తెలిపారు. విడుదలైన తర్వాత కేరళకు తిరిగి వచ్చి ఇరిట్టిలో బంధువుల హోటల్‌లో పనిచేస్తూనే మెథాంఫెటమైన్, ఇతర మాదకద్రవ్యాల సరఫరా కోసం విస్తృత నెట్‌వర్క్‌ను ఏర్పాటు చేసినట్లు వెల్లడించారు.

టూరిస్ట్ బస్సు ద్వారా డ్రగ్స్ రవాణా

జూన్ 22న అంతర్రాష్ట్ర టూరిస్ట్ బస్సు ప్రయాణికులు, సిబ్బంది ద్వారా డ్రగ్స్ తరలిస్తున్నారనే సమాచారంతో పోలీసులు తనిఖీలు నిర్వహించారు. ఈ సందర్భంగా డెన్నీ అబ్రహాం అనే వ్యక్తిని మెథాంఫెటమైన్ అక్రమ రవాణా ఆరోపణలపై అరెస్టు చేశారు.

డెన్నీని విచారించడంతో పాటు అతని కాల్ రికార్డులు, బ్యాంకు లావాదేవీలను పరిశీలించగా, ఫజలుద్దీన్ నిర్వహిస్తున్న అంతర్రాష్ట్ర డ్రగ్స్ నెట్‌వర్క్ వెలుగులోకి వచ్చినట్లు పోలీసులు తెలిపారు. అనంతరం అతని కదలికలపై నిఘా పెట్టి జూలై 14న అరెస్టు చేసినట్లు వెల్లడించారు.

ఈ కేసుకు సంబంధించి మరింత లోతైన దర్యాప్తు కొనసాగుతోందని, డ్రగ్స్ సరఫరా నెట్‌వర్క్‌లో ఉన్న ఇతర వ్యక్తుల కోసం కూడా గాలింపు చర్యలు చేపట్టినట్లు పోలీసులు తెలిపారు.