కువైట్ : భద్రతా లోపాల కారణంగా కువైట్ ప్రభుత్వం పలు ల్యాండ్ రోవర్ ఎస్‌యూవీ మోడళ్లను రీకాల్ చేసింది. 2022–2027 రేంజ్ రోవర్, 2020–2027 డిఫెండర్, 2021–2027 డిస్కవరీ మోడళ్లను రీకాల్ చేసినట్టు కువైట్ వాణిజ్య, పరిశ్రమల మంత్రిత్వ శాఖ ఆగస్టు 3న ప్రకటించింది. ఈ వాహనాల్లోని ఎయిర్‌బ్యాగ్ వ్యవస్థలో కనెక్టర్ కాలక్రమేణా తుప్పు పట్టే అవకాశం ఉందని, దీంతో భద్రతాపరమైన సమస్యలు తలెత్తే ప్రమాదం ఉన్నట్లు అధికారులు తెలిపారు. ఈ మోడళ్ల యజమానులు తమ వాహనాలను వెంటనే అధికారిక సర్వీస్ కేంద్రాలకు తీసుకువెళ్లి ఉచితంగా తనిఖీ చేయించాలని మంత్రిత్వ శాఖ సూచించింది.

వాహన యజమానులు అలి మహ్మద్ తునయాన్ అల్‌ఘనిమ్ అండ్ సన్స్ ఆటోమోటివ్ కంపెనీ హెల్ప్‌లైన్ 1846464ను సంప్రదించి ముందస్తుగా అపాయింట్‌మెంట్ బుక్ చేసుకోవాలని సూచించారు. కాగా, ఈ ల్యాండ్ రోవర్ వాహనాలను బ్రిటన్‌కు చెందిన జాగ్వార్ ల్యాండ్ రోవర్ (JLR) తయారు చేస్తోంది. ఈ సంస్థ ప్రస్తుతం భారతీయ ఆటోమొబైల్ దిగ్గజం టాటా మోటార్స్ ఆధీనంలో ఉంది.

ఇటీవలే సౌదీ అరేబియా కూడా 2025 ఆడి Q5 మోడల్‌కు చెందిన 96 వాహనాలను సీటుబెల్ట్ ప్రీటెన్షనర్‌లో లోపం కారణంగా రీకాల్ చేసింది. అలాగే ఈ ఏడాది ప్రారంభంలో ఇంజిన్ స్టార్టర్‌లో అగ్నిప్రమాద ప్రమాదం ఉన్న నేపథ్యంలో బీఎండబ్ల్యూ ప్రపంచవ్యాప్తంగా చేపట్టిన రీకాల్ ప్రభావం యూఏఈలోని వాహన యజమానులపై కూడా పడింది.