జెడ్డా: సౌదీ అరేబియాలో అభివృద్ధి గృహ పథకాల లబ్ధిదారుల కోసం ఇళ్ల నిర్మాణానికి ప్రైవేట్ పెట్టుబడిదారులను ప్రోత్సహించే కొత్త విధానానికి కేబినెట్ ఆమోదం తెలిపింది. ఈ విధానం ప్రకారం పెట్టుబడిదారులు ప్రణాళికాబద్ధమైన భూమిలో ఇళ్లను నిర్మించి,  ఆ భూమిలో నిర్దిష్ట శాతం యాజమాన్య హక్కులు పొందనున్నారు. జెడ్డాలో యువరాజు, ప్రధానమంత్రి మహ్మద్ బిన్ సల్మాన్ అధ్యక్షతన జరిగిన కేబినెట్ సమావేశంలో ఈ నిర్ణయం తీసుకున్నారు. అలాగే, పత్రాలు లేని రియల్ ఎస్టేట్ లావాదేవీలను క్రమబద్ధీకరించేందుకు ఇచ్చిన గడువును మరో ఏడాది పొడిగించారు.

సమావేశంలో అమెరికా అధ్యక్షుడు డొనాల్డ్ ట్రంప్‌తో ఇటీవల జరిగిన ఫోన్ సంభాషణ వివరాలను క్రౌన్ ప్రిన్స్ కేబినెట్‌కు వివరించారు. ప్రాంతీయ ఉద్రిక్తతలను తగ్గించేందుకు సంభాషణలే ఉత్తమ మార్గమని, శాంతి స్థాపన ద్వారా దౌత్యపరమైన పరిష్కారాలకు అవకాశం కల్పించాలని సౌదీ అరేబియా భావిస్తున్నట్లు తెలిపారు. గాజాలో నిరాయుధీకరణకు సంబంధించిన చారిత్రాత్మక ఒప్పందాన్ని కేబినెట్ స్వాగతించింది. ఇది సమగ్ర రాజకీయ ప్రక్రియకు నాంది పలికి, పాలస్తీనా ప్రజలకు స్వతంత్ర రాష్ట్రం ఏర్పాటు దిశగా ముందడుగు అవుతుందని ఆశాభావం వ్యక్తం చేసింది. ఈ ఒప్పందం సాధనలో ఈజిప్ట్, ఖతార్, టర్కియే, అమెరికా తదితర దేశాల కృషిని ప్రశంసించింది.

అంతర్జాతీయ ద్రవ్య నిధి (ఐఎంఎఫ్) విడుదల చేసిన 2026 ఆర్టికల్-4 నివేదికను కూడా కేబినెట్ స్వాగతించింది. సౌదీ ఆర్థిక వ్యవస్థ బలంగా ఉందని, 'విజన్-2030' సంస్కరణలతో దేశం ఆర్థికంగా మరింత పురోగతి సాధించిందని నివేదిక పేర్కొన్నట్లు వెల్లడించింది. అదనంగా ఈక్వడార్, కజకిస్థాన్, స్పెయిన్, సోమాలియా, దక్షిణ కొరియా, టర్కియేతో పెట్టుబడులు, పౌర విమానయానం, సముద్ర రవాణా, సాంకేతిక విద్య, అంతరిక్ష రంగాల్లో సహకార ఒప్పందాలకు కూడా కేబినెట్ ఆమోదం తెలిపింది.