ఉత్తరాంధ్ర ప్రజలు ఎంతో ఆసక్తిగా ఎదురుచూస్తున్న తరుణం రానే వచ్చింది. భోగాపురం అంతర్జాతీయ విమానాశ్రయం నుంచి విమాన సర్వీసులు అధికారికంగా ప్రారంభమయ్యాయి. ఉదయం 6 గంటలకు అధికారులు లాంప్ లైటింగ్ (జ్యోతి ప్రజ్వలన) కార్యక్రమంతో ఎయిర్‌పోర్ట్ కార్యకలాపాలను ప్రారంభించారు. హైదరాబాద్ నుంచి బయలుదేరిన తొలి ఇండిగో షెడ్యూల్డ్ విమానం ఉదయం 6:45 గంటలకు భోగాపురం ఎయిర్‌పోర్ట్‌కు చేరుకుంది.

తొలి ప్రయాణికులకు ఘన స్వాగతం మరియు విమాన వేళలు
ఈ చారిత్రాత్మక సందర్భాన్ని పురస్కరించుకుని ఎయిర్‌లైన్స్ సిబ్బంది ప్రయాణికులతో కలిసి కేక్ కట్ చేసి సంబరాలు నిర్వహించారు. అంతేకాకుండా, తొలి ప్రయాణంలో పాల్గొన్న వారికి జ్ఞాపకార్థంగా ‘ఫస్ట్ ఫ్లైట్ సర్టిఫికెట్లు’ అందజేశారు. భోగాపురం నుంచి ఉదయం 7:30 గంటలకు విమానం తిరిగి హైదరాబాద్‌కు పయనం కానుంది. అలాగే, ఉదయం 8:00 గంటలకు హైదరాబాద్ నుంచి బెంగళూరుకు సర్వీసులు కొనసాగనున్నాయి.

అల్లూరి సీతారామరాజు పేరుతో గ్రీన్‌ఫీల్డ్ విమానాశ్రయం
అంతర్జాతీయ ప్రమాణాలతో అత్యాధునికంగా ముస్తాబైన ఈ సరికొత్త గ్రీన్‌ఫీల్డ్ ఎయిర్‌పోర్ట్‌కు మన్యం వీరుడు ‘అల్లూరి సీతారామరాజు అంతర్జాతీయ విమానాశ్రయం’గా నామకరణం చేశారు. ఈ సోమవారం ఉదయం నుంచి ఈ విమానాశ్రయం పూర్తిస్థాయిలో ప్రయాణికులకు అందుబాటులోకి వచ్చింది. ఇప్పటివరకు విశాఖపట్నానికి ఉన్న అంతర్జాతీయ గుర్తింపు కోడ్ ‘VTZ’ ఇకపై భోగాపురం విమానాశ్రయం నుండే ఆపరేట్ కానుంది.

విశాఖ పాత ఎయిర్‌పోర్ట్‌లో ముగిసిన కమర్షియల్ సేవలు
మరోవైపు, షీలానగర్‌లోని విశాఖపట్నం పాత ఎయిర్‌పోర్ట్‌లో ప్యాసింజర్ రాకపోకలు ఆదివారంతో అధికారికంగా ముగిశాయి. కేంద్ర పౌర విమానయాన శాఖ నిబంధనల ప్రకారం ఆదివారం రాత్రి నుంచే ఇక్కడ కమర్షియల్ విమానాల రాకపోకలు పూర్తిగా నిలిచిపోయాయి. ఇకపై ఈ రన్‌వే కేవలం మిలిటరీ, నేవీ రక్షణ అవసరాలు మరియు వీఐపీ విమానాల రాకపోకలకే పరిమితం కానుంది.

ప్రయాణికుల సౌకర్యార్థం APSRTC ఏరో ఎక్స్‌ప్రెస్‌లు
కొత్తగా ప్రారంభమైన భోగాపురం ఎయిర్‌పోర్ట్‌కు విశాఖ నుంచి ప్రయాణాన్ని అత్యంత సులభతరం చేసేందుకు ఏపీఎస్‌ఆర్టీసీ పక్కా ప్రణాళికతో ముందుకు వెళ్తోంది. విమానాశ్రయానికి ప్రయాణికులను చేరవేసేందుకు ‘ఏరో ఎక్స్‌ప్రెస్‌’ పేరుతో ప్రత్యేకంగా 20 ఎలక్ట్రిక్‌ బస్సులను కేటాయించారు. ఈ బస్సులను మంత్రి అనగాని సత్యప్రసాద్ ప్రారంభించారు. రాష్ట్రంలో మొత్తం వెయ్యి ఎలక్ట్రిక్ బస్సులను అందుబాటులోకి తీసుకురావడమే ప్రభుత్వ లక్ష్యమని ఆయన ఈ సందర్భంగా వెల్లడించారు.