దోహా: ఖతార్‌లో స్మార్ట్ రవాణా వ్యవస్థల దిశగా కీలక అడుగు పడింది. ఆటోమేటిక్ రోబోట్యాక్సీలను దశలవారీగా ప్రజలకు అందుబాటులోకి తీసుకురావడంతో పాటు.. ప్రజా రవాణా కోసం దీర్ఘకాలిక మాస్టర్ ప్లాన్‌ను ప్రభుత్వం సిద్ధం చేస్తోంది. మరోవైపు దేశంలోని ప్రధాన పోర్టుల్లో భారీగా కార్గో కార్యకలాపాలు నమోదవుతున్నాయి.

ఖతార్ రవాణా మంత్రిత్వ శాఖ చేపట్టిన ఎలక్ట్రిక్ రోబోట్యాక్సీ పైలట్ కార్యక్రమంలో ఇప్పటివరకు సుమారు 2,500 ట్రిప్పులు పూర్తయ్యాయి. 2025 ఆగస్టులో ప్రారంభమైన ఈ కార్యక్రమం అనంతరం కర్వా యాప్ ద్వారా పైలట్ వాణిజ్య సేవలు నిర్వహించారు. వీటిలో 94 శాతం ట్రిప్పులు మానవ జోక్యం లేకుండానే పూర్తయ్యాయని మంత్రిత్వ శాఖ తెలిపింది. అయితే పైలట్ దశలో శిక్షణ పొందిన భద్రతా అధికారి పర్యవేక్షణ కొనసాగింది. ఇక తదుపరి దశలో భద్రతా అధికారి వాహనంలో లేకుండానే రెండు ఆటోమేటిక్ రోబోట్యాక్సీలను పరీక్షించనున్నారు. వీటిని రిమోట్ ఆపరేషన్ ద్వారా పర్యవేక్షిస్తారు.

మూడు మార్గాల్లో పరీక్షలు
రోబోట్యాక్సీ సేవల కోసం ఇప్పటికే మూడు మార్గాలను పరీక్షించి ఆమోదించారు.
- ఓల్డ్ దోహా పోర్ట్ – ది గేట్ మాల్
- సౌక్ వకీఫ్ – షెరటాన్ దోహా హోటల్
- మ్యూజియం ఆఫ్ ఇస్లామిక్ ఆర్ట్ – వెస్ట్ బే
ప్రతి మార్గంలో దశలవారీగా సేవలను విస్తరించనున్నారు. అవసరమైన అన్ని భద్రతా ప్రమాణాలు నెరవేరిన తర్వాతే తదుపరి దశకు వెళ్లనున్నారు. పూర్తి భద్రతను నిర్ధారించిన అనంతరం కర్వా యాప్ ద్వారా ఈ సేవలను ప్రజలకు అందుబాటులోకి తీసుకురానున్నారు.

 కొత్త మాస్టర్ ప్లాన్
ఖతార్ ప్రజా రవాణా వ్యవస్థను మరింత సమగ్రంగా, స్థిరమైన రీతిలో అభివృద్ధి చేసేందుకు ఖతార్ పబ్లిక్ ట్రాన్స్‌పోర్ట్ మాస్టర్ ప్లాన్ను రూపొందిస్తున్నారు. జూన్‌లో ఈ ప్రణాళికపై తొలి వర్క్‌షాప్ నిర్వహించారు. దేశ జనాభా, పట్టణ ప్రాంతాలు, ఆర్థిక వ్యవస్థ విస్తరిస్తున్న నేపథ్యంలో ప్రజా రవాణా వ్యవస్థను మరింత సమర్థంగా తీర్చిదిద్దడం ఈ ప్రణాళిక లక్ష్యం. రవాణా సౌకర్యాలను మెరుగుపరచడం, ట్రాఫిక్ రద్దీని తగ్గించడం, వ్యక్తిగత వాహనాలపై ఆధారపడటాన్ని తగ్గించడం వంటి అంశాలకు ప్రాధాన్యం ఇవ్వనున్నారు. భవిష్యత్ రవాణా పెట్టుబడులు, మౌలిక వసతుల అభివృద్ధికి ప్రాధాన్యత క్రమాన్ని నిర్ణయించేందుకు ఈ మాస్టర్ ప్లాన్ ఉపయోగపడనుంది.

 భారీగా కార్గో రవాణా
మరోవైపు ఖతార్ సముద్ర రవాణా రంగంలోనూ భారీ కార్యకలాపాలు నమోదయ్యాయి. 2026 తొలి ఆరు నెలల్లో దేశంలోని వాణిజ్య పోర్టులు 493,105 TEUs కంటైనర్లను నిర్వహించాయి. అదే సమయంలో 273,325 టన్నుల జనరల్ కార్గో, 324,000 టన్నులకు పైగా బల్క్ కార్గోను నిర్వహించినట్లు మవాని ఖతార్ గణాంకాలు వెల్లడించాయి. జనవరి నుంచి జూన్ వరకు హమద్ పోర్ట్, దోహా పోర్ట్, అల్ రువైస్ పోర్ట్‌లకు మొత్తం 866 నౌకల రాకపోకలు నమోదయ్యాయి.

మొత్తంగా చూస్తే ఖతార్‌లో ప్రజల ప్రయాణం నుంచి సరకు రవాణా వరకు కీలక మార్పులు చోటుచేసుకుంటున్నాయి. ఒకవైపు రోబోట్యాక్సీలతో స్మార్ట్ మొబిలిటీకి ఊతమిస్తుండగా.. మరోవైపు పోర్టుల ద్వారా వాణిజ్య, లాజిస్టిక్స్ కార్యకలాపాలను బలోపేతం చేస్తోంది. భవిష్యత్ రవాణా అవసరాలకు అనుగుణంగా దేశ మౌలిక వసతులను అభివృద్ధి చేయడమే లక్ష్యంగా ముందుకు సాగుతోంది.