కువైట్‌: మీ పేరుపై ఎన్ని మొబైల్‌ నంబర్లు, టెలికమ్యూనికేషన్‌ సేవలు నమోదై ఉన్నాయో ఇక సులభంగా తెలుసుకోవచ్చు. కమ్యూనికేషన్స్‌ అండ్‌ ఇన్ఫర్మేషన్‌ టెక్నాలజీ రెగ్యులేటరీ అథారిటీ (CITRA) ‘సహల్‌’ ప్రభుత్వ సేవల యాప్‌లో ‘మై నంబర్స్‌’ పేరుతో కొత్త సర్వీస్‌ను అందుబాటులోకి తీసుకొచ్చింది. టెలికాం సంస్థల సహకారంతో ప్రారంభించిన ఈ సేవ ద్వారా పౌరులు, నివాసితులు తమ పేరుపై వివిధ టెలికాం ఆపరేటర్ల వద్ద నమోదైన అన్ని ఫోన్‌ నంబర్లు, కమ్యూనికేషన్‌ సేవలను ఒకే చోట చూసుకోవచ్చు.

వినియోగదారులు తమ వ్యక్తిగత వివరాలను సులభంగా ధృవీకరించుకోవడంతో పాటు డిజిటల్‌ అవగాహన పెంచడం, పారదర్శకతను మెరుగుపరచడం, వ్యక్తిగత డేటా గోప్యతకు మరింత రక్షణ కల్పించడం ఈ సేవ ప్రధాన ఉద్దేశమని CITRA తెలిపింది. తమ పేరుపై నమోదైన ఫోన్‌ నంబర్లను ‘సహల్‌’ యాప్‌ ద్వారా పరిశీలించాలని అధికారులు సూచించారు. వ్యక్తిగత సమాచారం సరిగ్గా ఉందో లేదో తెలుసుకోవడంతో పాటు, తమ అనుమతి లేకుండా ఏదైనా నంబర్‌ నమోదై ఉంటే గుర్తించేందుకు ఈ సేవ ఉపయోగపడుతుందని పేర్కొన్నారు.