న్యూఢిల్లీ: విదేశాలకు వెళ్లే ప్రయాణికులకు మరింత సౌకర్యం కల్పించే ఉద్దేశంతో భారత విమానాశ్రయాల్లో ఇమ్మిగ్రేషన్‌ క్లియరెన్స్‌ సమయంలో బోర్డింగ్‌ పాస్‌పై ఫిజికల్ స్టాంపింగ్‌ను సెప్టెంబర్‌ 1 నుంచి నిలిపివేయనున్నారు. ఈ నిర్ణయాన్ని కేంద్ర హోం మంత్రిత్వశాఖ పరిధిలోని బ్యూరో ఆఫ్‌ ఇమ్మిగ్రేషన్‌ (BoI) విమానాశ్రయ అధికారులకు తెలియజేసింది. ఇప్పటివరకు అమల్లో ఉన్న బోర్డింగ్‌ పాస్‌ స్టాంపింగ్‌ విధానం ప్రయాణికులకు అసౌకర్యంగా మారుతోందన్న నేపథ్యంలో ఈ మార్పు చేసినట్లు అధికారులు తెలిపారు.

అయితే ఎలక్ట్రానిక్‌, ప్రింటెడ్‌ బోర్డింగ్‌ పాస్‌లు రెండూ ఇమ్మిగ్రేషన్‌ కౌంటర్లలో చెల్లుబాటు అవుతాయి. ప్రయాణికులు తమ స్మార్ట్‌ఫోన్‌లోని ఈ-బోర్డింగ్‌ పాస్‌ను చూపించి ఇమ్మిగ్రేషన్‌ క్లియరెన్స్‌ పొందవచ్చు. ప్రింటెడ్‌ బోర్డింగ్‌ పాస్‌ ఉన్నవారికీ అదే విధానం కొనసాగుతుంది. బోర్డింగ్‌ పాస్‌పై స్టాంప్‌ వేయాల్సిన అవసరం లేకపోవడంతో విమానాశ్రయాల్లో ఇమ్మిగ్రేషన్‌ ప్రక్రియ మరింత వేగంగా, సులభంగా పూర్తయ్యే అవకాశం ఉందని అధికారులు భావిస్తున్నారు.