వాషింగ్టన్: యుద్ధాల కారణంగా ఏర్పడుతున్న ఆహార కొరత ఇక కేవలం మానవతా సమస్య మాత్రమే కాదని, అది నేరుగా అంతర్జాతీయ శాంతి, భద్రత పరిరక్షణతో ముడిపడి ఉందని కువైట్ ఐక్యరాజ్యసమితి భద్రతా మండలికి తెలిపింది. ‘ఫుడ్ అండర్ ఫైర్’ అంశంపై ఉన్నతస్థాయి బహిరంగ చర్చలో ఐరాసలో కువైట్ శాశ్వత ప్రతినిధి, రాయబారి తారిఖ్ అల్-బనాయ్ పాల్గొని, ఈ మేరకు కీలక వ్యాఖ్యలు చేశారు.

ప్రస్తుతం అంతర్జాతీయ సమాజం ఇప్పటికే చేసుకున్న ఒప్పందాలు, కట్టుబాట్లను అమలు చేయడంపై దృష్టి పెట్టాలని అల్-బనాయ్ అన్నారు. పౌరులను ఆకలితో అలమటింపజేయడాన్ని యుద్ధ పద్ధతిగా ఉపయోగించడాన్ని అడ్డుకోవాలని కోరారు. కరువు సంభవించిన తర్వాత స్పందించడం కాకుండా, ముందస్తు హెచ్చరిక వ్యవస్థలు, భద్రతా మండలి తీర్మానాల ద్వారా కరువును ముందుగానే నివారించాల్సిన అవసరం ఉందన్నారు.

ఆహారం పొందే మానవ హక్కును అడ్డుకోవడం వల్ల కలిగే దుష్పరిణామాలకు గాజా స్పష్టమైన ఉదాహరణ అని అల్-బనాయ్ పేర్కొన్నారు. గాజాపై కొనసాగుతున్న దిగ్బంధనం, సహాయ సామగ్రి, వస్తువుల ప్రవేశంపై ఇజ్రాయెల్ విధిస్తున్న ఆంక్షలు, పౌర మౌలిక సదుపాయాలు, ఉత్పత్తి కేంద్రాలపై జరిగిన భారీ విధ్వంసం కారణంగా గాజాలోని కొన్ని ప్రాంతాల్లో కరువు పరిస్థితులు ఏర్పడ్డాయని తెలిపారు.

పౌరులను ‘ఆకలితో అలమటించాలా.. లొంగిపోవాలా’ అనే పరిస్థితిలోకి నెట్టడం అంతర్జాతీయ చట్టం, అంతర్జాతీయ మానవతా చట్టం, మానవ గౌరవానికి సంబంధించిన ప్రాథమిక సూత్రాలకు విరుద్ధమని ఆయన విమర్శించారు.

ప్రాంతీయ పరిణామాలను ప్రస్తావిస్తూ.. యుద్ధాల ప్రభావం దేశాల సరిహద్దులకే పరిమితం కావడం లేదని, ప్రపంచ సరఫరా గొలుసులు, మార్కెట్లపై కూడా ప్రభావం చూపుతోందని అల్-బనాయ్ అన్నారు.

హోర్ముజ్ జలసంధిని ఇరాన్ కొనసాగిస్తున్న మూసివేతను కువైట్ తీవ్రంగా ఖండించింది. ఇది ప్రపంచ సరఫరా గొలుసుల భద్రత, స్థిరత్వానికి ప్రత్యక్ష ముప్పుగా ఆయన అభివర్ణించారు. దీని ప్రభావం కేవలం ఇంధన భద్రతకే పరిమితం కాకుండా.. వాణిజ్యానికి అంతరాయం, రవాణా, ఇంధనం, ఎరువుల ధరలు పెరగడం ద్వారా ప్రపంచ ఆహార భద్రతపైనా పడుతుందని హెచ్చరించారు.

ఉపాధి, జీవనోపాధి దెబ్బతినడం, పేదరికం పెరగడం, సామాజికంగా పక్కకు నెట్టబడిన వర్గాలు పెరగడం, వనరుల కోసం పోటీ తీవ్రం కావడం వల్ల సమాజాలు మరింత బలహీనంగా మారుతాయని అల్-బనాయ్ అన్నారు. ఇటువంటి పరిస్థితులను ఉగ్రవాద, తీవ్రవాద సంస్థలు తమ నియామకాలు, రెచ్చగొట్టే చర్యలు, హింసను పెంచేందుకు ఉపయోగించుకునే అవకాశం ఉందని హెచ్చరించారు.

యుద్ధాలు, ఆహార కొరత మధ్య సంబంధాన్ని భద్రతా మండలి 2018లోనే గుర్తించిందని అల్-బనాయ్ గుర్తుచేశారు. కువైట్ భద్రతా మండలి సభ్యదేశంగా ఉన్న సమయంలో సహ-ప్రాయోజకత్వం వహించిన భద్రతా మండలి తీర్మానం 2417ను ఏకగ్రీవంగా ఆమోదించినట్లు తెలిపారు. ఈ తీర్మానం ఘర్షణలు, ఆకలి మధ్య సంబంధాన్ని స్పష్టం చేయడంతో పాటు పౌరులను ఆకలితో అలమటింపజేయడం, చట్టవిరుద్ధంగా మానవతా సహాయాన్ని అడ్డుకోవడాన్ని ఖండించిందన్నారు.

2026 గ్లోబల్ రిపోర్ట్ ఆన్ ఫుడ్ క్రైసెస్ ప్రకారం గత దశాబ్దంలో తీవ్రమైన ఆకలితో బాధపడుతున్న వారి సంఖ్య రెట్టింపైందని అల్-బనాయ్ తెలిపారు. అత్యంత తీవ్రమైన, విపత్తు స్థాయి ఆకలిని ఎదుర్కొంటున్న వారి సంఖ్య 2016తో పోలిస్తే తొమ్మిది రెట్లు పెరిగిందన్నారు. ఆకలితో అలసిపోయి, జీవనోపాధిని కోల్పోయిన సమాజం శాశ్వత శాంతి, స్థిరత్వాన్ని నిర్మించలేదని అల్-బనాయ్ పేర్కొన్నారు.