కువైట్: కువైట్ చరిత్రలోనే అతిపెద్ద డ్రగ్స్‌ రవాణా ఆపరేషన్‌ను విజయవంతంగా భగ్నం చేసినట్లు దేశ ఉప ప్రధాని, అంతర్గత వ్యవహారాల మంత్రి షేక్ ఫహద్ యూసుఫ్ సౌద్ అల్-సబాహ్ ప్రకటించారు. స్వాధీనం చేసుకున్న మాదక పదార్థాల మొత్తం మార్కెట్ విలువ సుమారు 150 మిలియన్ కువైటీ దినార్లుగా అంచనా వేశారు. ఈ ఆపరేషన్‌లో దాదాపు 5 టన్నుల ముడి లిరికా (Lyrica) పౌడర్, విక్రయానికి సిద్ధంగా ఉన్న సుమారు 40 లక్షల క్యాప్సూల్స్ను అధికారులు స్వాధీనం చేసుకున్నారు.

 డ్రగ్స్‌ వ్యతిరేక అధికారుల అప్రమత్తత, విస్తృత భద్రతా చర్యల కారణంగానే ఇంత భారీ స్థాయి అక్రమ రవాణా కుట్రను అడ్డుకోగలిగామని మంత్రి తెలిపారు. కువైట్‌లో డ్రగ్స్‌ నియంత్రణ తమ మంత్రిత్వ శాఖకు అత్యంత ప్రాధాన్య అంశాల్లో ఒకటని ఆయన పేర్కొన్నారు. డ్రగ్స్‌ అక్రమ రవాణాదారులు, విక్రయదారులపై చర్యలు కొనసాగించడంతో పాటు, పర్యవేక్షణను కఠినతరం చేసి డ్రగ్స్‌ సరఫరా వనరులను పూర్తిగా అడ్డుకునేందుకు చర్యలు తీసుకుంటున్నట్లు తెలిపారు.

కువైట్ సామాజిక వ్యవహారాల మంత్రిత్వ శాఖ నిర్వహించిన “A Nation That Protects You” అనే జాతీయ డ్రగ్స్‌ నివారణ అవగాహన ప్రచారం ముగింపు కార్యక్రమంలో మంత్రి ఈ వివరాలను వెల్లడించారు. డ్రగ్స్‌ వ్యతిరేక పోరాటం కేవలం అవగాహన కార్యక్రమం మాత్రమే కాదని, దేశ యువతను రక్షించడం ప్రతి ఒక్కరి బాధ్యత అనే జాతీయ సందేశమని ఆయన అన్నారు. డ్రగ్స్‌ ప్రభావం వ్యక్తులకే పరిమితం కాకుండా కుటుంబాలు, సమాజం, దేశ భవిష్యత్తుపైనా తీవ్ర ప్రభావం చూపుతుందని పేర్కొన్నారు.

డ్రగ్స్‌ వ్యతిరేక పోరాటం అరెస్టులు, స్వాధీనం చేసుకోవడంతో మాత్రమే పూర్తికాదని మంత్రి స్పష్టం చేశారు. చికిత్స, పునరావాసం కూడా కీలక భాగాలని తెలిపారు.మాదకద్రవ్యాల వ్యసనానికి గురైన వారికి తిరిగి కుటుంబం, సమాజంలో సాధారణ జీవితం గడిపే అవకాశం కల్పించాల్సిన అవసరం ఉందన్నారు. మహిళల డ్రగ్స్‌ వ్యసన చికిత్స, పునరావాసం కోసం అత్యాధునిక సదుపాయాలతో ప్రత్యేక విభాగాన్ని ఏర్పాటు చేసినట్లు తెలిపారు. చికిత్సా వ్యవస్థ సామర్థ్యాన్ని పెంచేందుకు మరిన్ని ప్రత్యేక కేంద్రాలను కూడా సిద్ధం చేస్తున్నట్లు వెల్లడించారు.

డ్రగ్స్‌ సమస్య ఎదుర్కొంటున్న కుటుంబాలు సహాయం కోరేందుకు వెనుకాడవద్దని షేక్ ఫహద్ తల్లిదండ్రులకు విజ్ఞప్తి చేశారు. ప్రభుత్వం అందించే చికిత్సా మార్గాల్లో గోప్యత, వ్యక్తిగత వివరాల రక్షణకు హామీ ఉందని తెలిపారు. అమల్లో ఉన్న చట్టాలు, నిబంధనల ప్రకారం చికిత్స కోసం ముందుకు వచ్చే డ్రగ్స్‌ వినియోగదారుడిపై క్రిమినల్ కేసులు ఉండవని మంత్రి స్పష్టం చేశారు. డ్రగ్స్‌ అక్రమ రవాణా మూలాలను ఛేదించేందుకు, సరఫరాదారులు మరియు విక్రయదారులపై చర్యలు తీసుకునేందుకు అన్ని ప్రభుత్వ సంస్థల సహకారంతో కువైట్ ప్రభుత్వం తన ప్రయత్నాలను కొనసాగిస్తుందని ఆయన స్పష్టం చేశారు.