రియాద్: డిజిటల్ టెక్నాలజీల వినియోగం వ్యక్తులు, సమాజంపై చూపుతున్న ప్రభావాన్ని అధ్యయనం చేయడంతో పాటు బాధ్యతాయుతమైన, స్థిరమైన డిజిటల్ వినియోగాన్ని ప్రోత్సహించేందుకు సౌదీ అరేబియాలో నాలుగు కొత్త కార్యక్రమాలు ప్రారంభమయ్యాయి.

కమ్యూనికేషన్స్, స్పేస్ అండ్ టెక్నాలజీ కమిషన్ (CST) మరియు ధహ్రాన్‌లోని కింగ్ అబ్దులఅజీజ్ సెంటర్ ఫర్ వరల్డ్ కల్చర్ (ఇథ్రా)కు చెందిన డిజిటల్ వెల్‌బీయింగ్ కార్యక్రమం ‘సింక్’ మధ్య కుదిరిన అవగాహన ఒప్పందం (MoU) కింద ఈ నాలుగు సుస్థిరత కార్యక్రమాలను ఇటీవల ప్రారంభించారు. ఈ కార్యక్రమాలు స్థానిక, అంతర్జాతీయ స్థాయిలో డిజిటల్ సుస్థిరత వ్యవస్థను మరింత అభివృద్ధి చేయడమే లక్ష్యంగా రూపొందించబడ్డాయి.

డిజిటల్ టెక్నాలజీ ప్రభావంపై అధ్యయనం

కొత్త కార్యక్రమాల్లో భాగంగా డిజిటల్ శ్రేయస్సుపై ఆధునిక పరిశోధనలు, అధ్యయనాలు, ప్రత్యేకంగా రూపొందించిన విద్యా కార్యక్రమాలను నిర్వహించనున్నారు. డిజిటల్ టెక్నాలజీల వినియోగం వ్యక్తులపై, సమాజంపై ఎలాంటి ప్రభావం చూపుతోందనే అంశాన్ని ప్రధానంగా పరిశీలించనున్నారు. అంతర్జాతీయ సంస్థలతో కలిసి ప్రత్యేక కార్యక్రమాలు, అవగాహన వర్క్‌షాప్‌లను కూడా నిర్వహించనున్నట్లు ఇథ్రా విడుదల చేసిన ప్రకటనలో పేర్కొన్నారు.

స్మార్ట్ నిర్ణయాలు..

ఈ కార్యక్రమాల ద్వారా జ్ఞాన మార్పిడి పెంచడం, మెరుగైన నిర్ణయాలు తీసుకునేందుకు సహకరించడం, భవిష్యత్ విధానాల రూపకల్పనకు అవసరమైన సమాచారం అందించడం లక్ష్యంగా పెట్టుకున్నారు. డిజిటల్ టెక్నాలజీలను బాధ్యతాయుతంగా, సుస్థిరంగా వినియోగించే విధానాలను ప్రోత్సహించడంలో ఈ కార్యక్రమాలు కీలక పాత్ర పోషించనున్నాయి. ఈ చర్యలు Saudi Vision 2030 లక్ష్యాలకు అనుగుణంగా డిజిటల్ రంగం అభివృద్ధికి తోడ్పడతాయని నిర్వాహకులు తెలిపారు.