యూఏఈ: 2026-27 విద్యా సంవత్సరం ప్రారంభమైన నేపథ్యంలో యూఏఈలోని పలు పాఠశాలలు విద్యార్థుల గ్రూమింగ్, యూనిఫాం, ఆరోగ్యకరమైన ఆహారపు అలవాట్లపై మరింత దృష్టి పెడుతున్నాయి. కొన్ని పాఠశాలలు తీవ్రమైన హెయిర్‌స్టైల్స్, హూడీలు, ఎనర్జీ డ్రింక్స్‌పై ఆంక్షలు విధించాయి. పాఠశాలలను బట్టి నిబంధనలను అమలు చేసే విధానం మారుతున్నప్పటికీ, విద్యార్థులను శిక్షించడం కంటే చదువుపై దృష్టి పెట్టే వాతావరణాన్ని కల్పించడం, వారి ఆరోగ్యం, సంక్షేమాన్ని కాపాడటమే ఈ నిబంధనల ఉద్దేశమని స్కూల్ యాజమాన్యాలు చెబుతున్నాయి.

హెయిర్‌స్టైల్స్, హూడీలపై నిబంధనలు

పలు పాఠశాలలు తలలోని కొంత భాగాన్ని పూర్తిగా షేవ్ చేసి, మిగతా భాగంలో పొడవాటి జుట్టు ఉంచే రకమైన ఎక్స్‌ట్రీమ్ హెయిర్‌స్టైల్స్‌పై ఆంక్షలు విధించాయి. బాలుర పొడవాటి జుట్టుపైనా కొన్ని స్కూళ్లు నిబంధనలు అమలు చేస్తున్నాయి. అలాగే స్కూల్ ప్రాంగణంలో హూడీలు ధరించడాన్ని కూడా కొన్ని పాఠశాలలు నిషేధించాయి. యూనిఫాం ప్రమాణాలను ఒకే విధంగా ఉంచడంతో పాటు, తరగతి గదుల్లో సరైన విద్యా వాతావరణాన్ని కొనసాగించేందుకు ఈ నిబంధనలు తీసుకొచ్చినట్లు యాజమాన్యాలు తెలిపాయి.

ఎనర్జీ డ్రింక్స్‌పై కఠిన ఆంక్షలు

విద్యార్థులు స్కూల్‌కు తీసుకొచ్చే ఆహారం, పానీయాలపైనా కొన్ని పాఠశాలలు నిబంధనలను కఠినతరం చేశాయి. క్రెడెన్స్ హై స్కూల్ CEO-ప్రిన్సిపల్ దీపికా థాపర్ సింగ్ మాట్లాడుతూ.. తమ స్కూల్‌లో యూనిఫాం, బిహేవియర్ పాలసీల కింద గ్రూమింగ్, హెయిర్‌స్టైల్స్‌కు స్పష్టమైన మార్గదర్శకాలు ఉన్నాయని తెలిపారు. ఎక్స్‌ట్రీమ్ లేదా షేవ్ చేసిన హెయిర్‌స్టైల్స్‌కు అనుమతి లేదని చెప్పారు.

స్కూల్ జెర్సీకి హుడ్ ఉన్నప్పటికీ, తరగతుల్లో లేదా స్కూల్ సమయంలో హుడ్‌ను తలపై వేసుకోవడానికి విద్యార్థులకు అనుమతి లేదన్నారు. తీవ్రమైన చలి పరిస్థితుల్లో, ముఖ్యంగా బస్సు ప్రయాణ సమయంలో మాత్రమే హుడ్ ఉపయోగించేందుకు సాధారణంగా అనుమతి ఉంటుందని తెలిపారు. స్కూల్ క్యాంపస్‌లో ఎనర్జీ డ్రింక్స్‌ను విక్రయించడం లేదా ప్రోత్సహించడం లేదని చెప్పారు.

క్రమశిక్షణ, సమానత్వానికి ప్రాధాన్యం

జెమ్స్ ఫౌండర్స్ స్కూల్ ఎగ్జిక్యూటివ్ ప్రిన్సిపల్/సీఈఓ మ్యాథ్యూ బర్ఫీల్డ్ మాట్లాడుతూ.. యూనిఫాం, హెయిర్‌స్టైల్ నిబంధనలు విద్యార్థుల్లో కమ్యూనిటీ భావన, ఆరోగ్యం, క్రమశిక్షణ పెంపొందించడమే లక్ష్యంగా ఉన్నాయని తెలిపారు. యూనిఫాం ప్రమాణాలు విద్యార్థుల్లో సమానత్వం, ఒకే గుర్తింపు భావనను పెంచుతాయని, హెయిర్‌స్టైల్, దుస్తులపై మార్గదర్శకాలు ప్రొఫెషనల్ లెర్నింగ్ వాతావరణానికి దోహదపడతాయని చెప్పారు. నిబంధనలు పాటించని సందర్భాల్లో విద్యార్థులతో ముందుగా మాట్లాడి సూచనలు ఇస్తామని, అవసరమైతే తల్లిదండ్రులను సంప్రదిస్తామని తెలిపారు.

అబుదాబి స్కూళ్లలో ఎనర్జీ డ్రింక్స్‌కు నో

దియాఫా ఇంటర్నేషనల్ స్కూల్ అబుదాబి ప్రిన్సిపల్ నికోల్ హేన్స్ మాట్లాడుతూ.. షేవ్ చేసిన హెయిర్‌స్టైల్స్‌ను తమ స్కూల్ ప్రత్యేకంగా నిషేధించలేదని తెలిపారు. హెయిర్‌స్టైల్స్ వ్యక్తిగత, సాంస్కృతిక, మతపరమైన ఎంపికలను ప్రతిబింబించవచ్చని పేర్కొన్నారు. అయితే దుస్తులు, రూపురేఖలకు సంబంధించి అబుదాబి డిపార్ట్‌మెంట్ ఆఫ్ ఎడ్యుకేషన్ అండ్ నాలెడ్జ్ (ADEK) కోడ్ ఆఫ్ కండక్ట్ ను అనుసరిస్తున్నట్లు తెలిపారు. స్కూల్ క్యాంపస్‌లో ఎనర్జీ డ్రింక్స్‌కు పూర్తిగా అనుమతి లేదని చెప్పారు. పిల్లలు, యువతలో ఎనర్జీ డ్రింక్స్ వల్ల కలిగే ఆరోగ్యపరమైన ప్రమాదాలను దృష్టిలో ఉంచుకుని ఈ నిబంధన అమలు చేస్తున్నట్లు వివరించారు.

మరికొన్ని స్కూళ్లలోనూ కఠిన నిబంధనలు

షైనింగ్ స్టార్ ఇంటర్నేషనల్ స్కూల్‌లో షేవ్ చేసిన డిజైన్లు, ఎక్స్‌ట్రీమ్ హెయిర్‌స్టైల్స్, అనుచిత గ్రూమింగ్‌పై ఆంక్షలు ఉన్నాయి. హూడీలపైనా పరిమితులు విధించారు. అలాగే స్కూల్ క్యాంటీన్‌లో ఎనర్జీ డ్రింక్స్, అధిక క్యాలరీల పానీయాలు, కొన్ని ఆహార పదార్థాలను అనుమతించడం లేదు.

నిబంధనలు పాటించని విద్యార్థులకు ముందుగా అవగాహన కల్పిస్తామని స్కూల్ యాజమాన్యం తెలిపింది. పదేపదే నిబంధనలు ఉల్లంఘిస్తే మౌఖిక హెచ్చరికలు, తల్లిదండ్రులకు సమాచారం, అవసరమైతే ADEK విద్యార్థుల ప్రవర్తనా విధానానికి అనుగుణంగా క్రమశిక్షణ చర్యలు తీసుకుంటామని వెల్లడించింది.