లువాండా: ఒమన్ సుల్తాన్ హైతమ్ బిన్ తారిక్ రెండు రోజుల అధికారిక పర్యటన కోసం స్నేహపూర్వక దేశమైన అంగోలాకు చేరుకున్నారు. అంగోలా అధ్యక్షుడు జోవో మాన్యుయెల్ లోరెన్సో ఆహ్వానం మేరకు ఆయన ఈ పర్యటన చేపట్టారు. లువాండా రాజధానిలోని క్వాట్రో డి ఫెవెరెరో అంతర్జాతీయ విమానాశ్రయానికి సుల్తాన్ హైతమ్ చేరుకోగా.. అంగోలా విదేశాంగ మంత్రి, గౌరవ స్వాగత బృందం అధిపతి టెటే ఆంటోనియోతో పాటు పలువురు అధికారులు ఆయనకు స్వాగతం పలికారు.  

అంగోలా అధ్యక్షుడితో కీలక భేటీ
సుల్తాన్ హైతమ్‌కు శుక్రవారం లువాండాలోని ప్రెసిడెన్షియల్ ప్యాలెస్‌లో అధికారిక స్వాగత కార్యక్రమం నిర్వహించనున్నారు. అనంతరం అంగోలా అధ్యక్షుడు జోవో మాన్యుయెల్ లోరెన్సోతో సుల్తాన్ హైతమ్ సమావేశం కానున్నారు. ఈ భేటీలో ఇరు దేశాలకు సంబంధించిన ద్వైపాక్షిక సంబంధాలు, పరస్పర సహకారానికి సంబంధించిన అంశాలపై చర్చలు జరిగే అవకాశం ఉంది. సుల్తాన్ వెంట ఉన్నతస్థాయి ప్రతినిధి బృందం కూడా పర్యటనలో పాల్గొంటుంది. ఈ పర్యటనతో ఒమన్–అంగోలా ద్వైపాక్షిక సంబంధాలకు మరింత ఊతం లభిస్తుందని భావిస్తున్నారు.