30 శాతం అగ్ని ప్రమాదాల విషయంలో దుబాయ్‌ సివిల్‌ డిఫెన్స్‌ కేవలం 4 నిమిషాల్లోనే స్పందించి, అరుదైన ఘనతను సొంతం చేసుకుంది. దుబాయ్‌ సివిల్‌ డిఫెన్స్‌ డైరెక్టర్‌ మేజర్‌ జనరల్‌ రషీద్‌ తని అల్‌ మత్రౌషి మాట్లాడుతూ, 90 శాతం అగ్ని ప్రమాదాల విషయంలో 6 నుంచి 8 నిమిషాల్లోనే స్పందించాలని టార్గెట్‌గా పెట్టుకోవడం జరుగుతుందని అన్నారు. అల్‌ హామ్రియా ఫైర్‌ స్టేషన్‌ని సందర్శించిన సందర్భంలో ఈ వ్యాఖ్యలు చేశారాయన. పబ్లిక్‌ కూడా సివిల్‌ డిఫెన్స్‌కి సహకరించాలనీ, అగ్ని ప్రమాదాల్లో పబ్లిక్‌ పాత్ర ఎంతో కీలకమని ఆయన వివరించారు. ప్రమాదం గురించి సమగ్ర సమాచారం అందించగలిగితే, పరిస్థితిపై ఓ అవగాహన ఏర్పాటుచేసుకుని, తగిన రీతిలో స్పందించడానికి వీలవుతుందని అల్‌ హామ్రియా చెప్పారు. అత్యవసర సమయాల్లో వాహనదారులు, ఫైర్‌ ట్రక్స్‌కి దారి విడిచిపెట్టడం ద్వారా ప్రమాద స్థలికి తొందరగా చేరుకోగలుగుతామన్నారు అల్‌ హమ్రియా. అంతర్జాతీయ ప్రమాణాలతో దుబాయ్‌ సివిల్‌ డిఫెన్స్‌ పనిచేస్తోందనీ, ప్రజలకు ఇంకా మెరుగైన సౌకర్యాలు అందించేందుకు నిరంతరం కొత్త ఆలోచనలు చేస్తున్నట్లు సివిల్‌ డిఫెన్స్‌ డైరెక్టర్‌ అల్‌ హామ్రియా వివరించారు.