ప్రస్తుతం 314 టైపింగ్‌ సెంటర్స్‌ యూఏఈలో ఎమిరేట్స్‌ ఐడీ కోసం ఇ-ఫామ్‌ టైపింగ్‌ సర్వీసుల్ని అందిస్తున్నాయి. కొత్త స్టాండర్డ్స్‌ని అందుకోగలిగిన టైపింగ్‌ సెంటర్స్‌ మాత్రమే, ఇ-ఫామ్‌ అప్లికేషన్‌ని యాక్సెప్ట్‌ చెయ్యడానికి అనుమతిస్తారు. కొత్త స్టాండర్డ్స్‌ కేవలం మంచి సర్వీసుని అప్లికెంట్లకు అందించడం కోసమే తీసుకొచ్చినట్లు అథికారిక వర్గాలు చెబుతున్నాయి. ఎమిరేట్స్‌ ఐడీ అథారిటీ సర్వీస్‌ సెంటర్స్‌ సపోర్ట్‌ డైరెక్టర్‌ నాజర్‌ అల్‌ అబ్దైలి మాట్లాడుతూ, అథారిటీ ఆమోదించిన ప్రాథమిక సూత్రాల్ని పరిగణలోకి తీసుకోకుండా పనిచేస్తున్న టైపింగ్‌ సర్వీస్‌ కేంద్రాల కారణంగా 99 శాతం తప్పిదాలు జరుగుతున్నాయని అన్నారు. ఈ కారణంగా ఐడీ కార్డుల జారీ ఆలస్యమవుతుందని ఆయన వివరించారు. ప్రస్తుతానికి పనిచేస్తున్న 314 టైపింగ్‌ సెంటర్స్‌తో పాటు ముందు ముందు మరికొన్ని సెంటర్స్‌ని కూడా అందుబాటులోకి తెచ్చేందుకు ప్రయత్నిస్తున్నారు. ఎమిరేట్స్‌ ఐడీ కోసం తామున్న ప్రాంతానికి పది కిలోమీటర్ల దూరంలోపలే టైపింగ్‌ సెంటర్‌ ఉండేలా అందరికీ ఏర్పాట్లు చేస్తున్నారు అధికారులు.