రియాద్: సౌదీ అరేబియాలో కొత్తగా ఆరు డ్రైవింగ్ పాఠశాలలను ఏర్పాటు చేయనున్నట్లు జనరల్ డైరెక్టరేట్ ఆఫ్ ట్రాఫిక్ ప్రకటించింది. దేశంలోని వివిధ ప్రాంతాలు, గవర్నరేట్లలో ఈ డ్రైవింగ్ పాఠశాలలను ఏర్పాటు చేయనున్నట్లు వెల్లడించింది. కొత్తగా ఏర్పాటు చేయనున్న డ్రైవింగ్ స్కూల్స్ అసీర్‌, జజాన్‌, దమ్మామ్ మెట్రోపాలిటన్ ప్రాంతం, హాయిల్‌, మక్కా, అల్-జౌఫ్‌లో ఏర్పాటు చేయనున్నట్లు తెలిపింది.

ఈ ప్రాజెక్టులో భాగస్వామ్యం కావాలనుకునే ఆసక్తిగల కంపెనీలు, సంస్థలు దరఖాస్తు చేసుకోవాలని ట్రాఫిక్ డైరెక్టరేట్ సూచించింది.ప్రాజెక్టుకు సంబంధించిన నిబంధనలు, షరతులు పొందేందుకు జనరల్ డైరెక్టరేట్ ఆఫ్ ట్రాఫిక్‌లోని ట్రాఫిక్ లైసెన్సెస్ విభాగాన్ని ఈ-మెయిల్ ద్వారా సంప్రదించాలని సూచించింది. ప్రకటన వెలువడిన తేదీ నుంచి ఒక నెలలోపు తమ దరఖాస్తులను సమర్పించాలని అధికారులు తెలిపారు.