అమెరికా: అమెరికా, ఇరాన్‌ మధ్య ఉద్రిక్తతలు మరోసారి పెరుగుతున్నాయి. ఇరాన్‌పై భారీ సైనిక చర్యలు చేపట్టేందుకు అమెరికా బలగాలు సిద్ధంగా ఉన్నాయంటూ అంతర్జాతీయ మీడియా కథనాలు వెలువడుతున్నాయి. అమెరికా అధ్యక్షుడు డొనాల్డ్‌ ట్రంప్‌ ఆదేశిస్తే.. 96 గంటల్లోనే కొత్త సైనిక ఆపరేషన్లు ప్రారంభించే సామర్థ్యం అమెరికా బలగాలకు ఉందని ఇద్దరు అమెరికా అధికారులు సీఎన్‌ఎన్‌కు వెల్లడించినట్లు కథనం పేర్కొంది. అయితే దాడులకు సంబంధించి ట్రంప్‌ ఇంకా తుది నిర్ణయం తీసుకోలేదు.

ఎన్నికల ఫలితాల తర్వాత కీలక నిర్ణయం?

నవంబర్‌ 3న అమెరికా మధ్యంతర ఎన్నికలు జరగనున్నాయి. ఈ ఎన్నికల్లో రిపబ్లికన్‌ పార్టీ భారీగా నష్టపోతే ట్రంప్‌ ఇరాన్‌పై మరింత దూకుడుగా వ్యవహరించే అవకాశం ఉందని ఓ అమెరికా అధికారి తెలిపినట్లు ఆక్సియోస్‌ కథనం వెల్లడించింది. ఎన్నికల్లో ఎదురయ్యే రాజకీయ పరిణామాల నేపథ్యంలో ఆయన పెద్ద నిర్ణయం తీసుకోవచ్చని ఆ అధికారి అభిప్రాయపడినట్లు పేర్కొంది. ఇరాన్‌ అధికారులకు కూడా ఈ విషయాన్ని తెలియజేస్తున్నట్లు నివేదిక తెలిపింది. ఒప్పందం కుదుర్చుకోవడానికి ఇదే సరైన సమయమని వారికి సంకేతాలు ఇస్తున్నట్లు వివరించింది. అయితే ఎన్నికల ఫలితాలు ఇరాన్‌పై ట్రంప్‌ తీసుకునే నిర్ణయాలను ప్రభావితం చేయవని వైట్‌హౌస్‌ అధికారి స్పష్టం చేసినట్లు ఆక్సియోస్‌ పేర్కొంది.

ఖతార్‌ మధ్యవర్తిత్వంలో కొనసాగుతున్న చర్చలు

మరోవైపు అమెరికా-ఇరాన్‌ మధ్య ప్రత్యక్ష చర్చలను తిరిగి ప్రారంభించేందుకు ఖతార్‌ మధ్యవర్తులు ప్రయత్నిస్తున్నారు. శుక్రవారం టెహ్రాన్‌లో 12 గంటలకు పైగా చర్చలు జరిపినట్లు దౌత్య వర్గాలను ఉటంకిస్తూ ఆక్సియోస్‌ వెల్లడించింది. చర్చల్లో కొంత సానుకూల పురోగతి కనిపించిందని ఓ దౌత్యవేత్త పేర్కొన్నారు. శనివారం దోహాలోనూ సంప్రదింపులు కొనసాగనున్నాయి. అణు కార్యక్రమానికి సంబంధించి రాయితీలు ఇవ్వాలని అమెరికా కోరుతోంది. మరోవైపు ముందుగా తమపై విధించిన నౌకాదళ దిగ్బంధనాన్ని ఎత్తివేయాలని, నిలిపివేసిన నిధులను విడుదల చేయాలని, చమురు విక్రయాలకు అనుమతించాలని ఇరాన్‌ డిమాండ్‌ చేస్తోంది. ఈ అంశాలపై ఇరు దేశాల మధ్య ఇంకా ఏకాభిప్రాయం కుదరలేదు.

96 గంటల్లో సైనిక చర్యలకు సిద్ధం

ట్రంప్‌ నుంచి ఆదేశాలు అందిన 96 గంటల్లోనే ఇరాన్‌పై కొత్త సైనిక చర్యలు ప్రారంభించేందుకు అమెరికా బలగాలు సిద్ధంగా ఉన్నాయని అక్టోబర్‌ 25న సీఎన్‌ఎన్‌ కథనం వెల్లడించింది. ఈసారి చేపట్టే ఆపరేషన్లు గతంలో జరిగిన పరిమిత దాడుల కంటే విస్తృతంగా ఉండే అవకాశం ఉందని అమెరికా అధికారులను ఉటంకించింది. ఇరాన్‌లోని ఇంధన మౌలిక సదుపాయాలు, సైనిక స్థావరాలు, అణు కేంద్రాలు లక్ష్యంగా దాడులు జరిగే అవకాశాలపై కూడా కథనాలు వెలువడ్డాయి. అయితే ఇవి ప్రస్తుతం పరిశీలనలో ఉన్న సైనిక ప్రణాళికలేనని, దాడులకు సంబంధించి అధ్యక్షుడు ట్రంప్‌ నుంచి ఎలాంటి తుది ఆదేశాలు వెలువడలేదని నివేదికలు స్పష్టం చేస్తున్నాయి. అమెరికా-ఇరాన్‌ మధ్య దౌత్య చర్చలు ఒకవైపు కొనసాగుతుండగా.. మరోవైపు సైనిక చర్యలపై ఊహాగానాలు పెరుగుతున్నాయి. ఈ నేపథ్యంలో పశ్చిమాసియాలో పరిస్థితులు ఎలా మారతాయన్నది ఆసక్తికరంగా మారింది.