బహ్రెయిన్: సోషల్ మీడియాలో పబ్లిక్ మోరల్స్ కు విరుద్ధంగా కంటెంట్‌ను ప్రచురించినట్లు ఆరోపణలు రావడంతో 22 ఏళ్ల యువతిని పోలీసులు అరెస్ట్ చేశారు. బహ్రెయిన్ అంతర్గత వ్యవహారాల మంత్రిత్వ శాఖ ఈ విషయాన్ని వెల్లడించింది. జనరల్ డైరెక్టరేట్ ఆఫ్ యాంటీ కరప్షన్ అండ్ ఎకనామిక్ అండ్ ఎలక్ట్రానిక్ సెక్యూరిటీలోని సైబర్ క్రైమ్ డైరెక్టరేట్ అధికారులు ఈ చర్యలు చేపట్టినట్టు పేర్కొంది..

యువతి సోషల్ మీడియా ఖాతాల్లో పోస్టు చేసిన ఫొటోలు, వీడియోలను పరిశీలించిన అధికారులు.. ఆమె దుస్తులు ప్రజా నైతిక విలువలకు విరుద్ధంగా ఉన్నట్లు గుర్తించారని మంత్రిత్వ శాఖ తెలిపింది. ఈ కేసులో అవసరమైన చట్టపరమైన ప్రక్రియలను పూర్తి చేసినట్లు అధికారులు వెల్లడించారు. 

ఈ సందర్భంగా సోషల్ మీడియాను ఉపయోగించేటప్పుడు చట్టాలు, నిబంధనలను తప్పనిసరిగా పాటించాలని మంత్రిత్వ శాఖ ప్రజలకు సూచించింది. ఆన్‌లైన్‌లో కంటెంట్‌ను పోస్టు చేసే సమయంలో సామాజిక, నైతిక బాధ్యతతో వ్యవహరించాలని, చట్టాలకు లేదా దేశ సంప్రదాయాలకు విరుద్ధమైన సమాచారాన్ని ప్రచురించడం, ఇతరులకు షేర్ చేయడం వంటివి నివారించాలని కోరింది.