TRONOX సంస్థలో Environmental Specialist‌గా 37 ఏళ్ల ఉద్యోగ ప్రస్థానానికి ముగింపు.. SATA ఆధ్వర్యంలో ఘనంగా ఆత్మీయ సత్కారం

యాంబు, సౌదీ అరేబియా: ప్రవాస భారతీయులకు మూడు దశాబ్దాలకు పైగా విశేష సేవలందిస్తూ, మానవతా దృక్పథంతో ఎంతోమంది హృదయాల్లో ప్రత్యేక స్థానం సంపాదించుకున్న చడలవాడ జాన్ సుందర్ శీలా ఉద్యోగ విరమణ సందర్భంగా సౌదీ అరేబియా తెలుగు అసోసియేషన్ (SATA) ఆధ్వర్యంలో ఘనంగా సత్కారం అందుకున్నారు.

TRONOX సంస్థలో Environmental Specialist‌గా పనిచేసిన ఆయన 2026 అక్టోబర్ 23న తన ఉద్యోగ జీవితానికి ముగింపు పలికి, ఫైనల్ ఎగ్జిట్‌ పై స్వదేశానికి తిరిగి వెళ్లారు. ఈ సందర్భంగా SATA వ్యవస్థాపకులు, కోర్ టీమ్ సభ్యులు ఆయనతో తమకున్న అనుబంధాన్ని, ఆయన అందించిన సేవలను గుర్తుచేసుకుంటూ ఆత్మీయ వీడ్కోలు కార్యక్రమాన్ని నిర్వహించారు.

నర్సాపురం నుంచి సౌదీ అరేబియా వరకు ప్రస్థానం

పశ్చిమ గోదావరి జిల్లా నర్సాపురానికి చెందిన చడలవాడ జాన్ సుందర్ శీలా,చడలవాడ తిరపయ్య, శ్రీమతి మేరీ దంపతుల కుమారుడు. బీఎస్సీ కెమిస్ట్రీ పూర్తి చేసిన ఆయన 1989లో సౌదీ అరేబియాకు చేరుకున్నారు. లేబొరేటరీ టెక్నీషియన్‌గా ఉద్యోగ జీవితాన్ని ప్రారంభించి, తన అనుభవం, నైపుణ్యం, క్రమశిక్షణతో అంచెలంచెలుగా ఎదిగి TRONOX సంస్థలో Environmental Specialist‌గా బాధ్యతలు నిర్వహించారు. దాదాపు 37 సంవత్సరాల సుదీర్ఘ ఉద్యోగ ప్రస్థానాన్ని విజయవంతంగా పూర్తి చేశారు.

1996 నుంచి సామాజిక సేవా ప్రస్థానం

ఉద్యోగ బాధ్యతలతో పాటు సమాజ సేవకు ప్రాధాన్యతనిస్తూ 1996 నుంచే ప్రవాస భారతీయులకు తనవంతు సహాయ సహకారాలు అందించడం ప్రారంభించారు. ముఖ్యంగా అత్యవసర పరిస్థితుల్లో ఉన్నవారికి అండగా నిలవడం, ఆర్థిక ఇబ్బందుల్లో ఉన్న కుటుంబాలకు సహాయం చేయడం, అనారోగ్య సమస్యలతో బాధపడుతున్న వారికి తోడ్పాటు అందించడం, సమస్యల్లో చిక్కుకున్న వారికి సరైన మార్గదర్శకత్వం చేయడం వంటి సేవా కార్యక్రమాల్లో చురుకుగా పాల్గొన్నారు.

సౌదీ అరేబియాలోని ఇండియన్ ఎంబసీ కోర్ టీమ్‌తో అనుసంధానమై ప్రవాస భారతీయుల సంక్షేమానికి సంబంధించిన పలు కార్యక్రమాల్లో భాగస్వామిగా ఉన్నారు. ముఖ్యంగా సౌదీలో మరణించిన భారతీయుల మృతదేహాలను స్వదేశానికి తరలించే ప్రక్రియలో బాధిత కుటుంబాలకు అవసరమైన సమాచారం, మార్గదర్శకత్వం, సమన్వయ సహకారం అందించారు. విదేశీ గడ్డపై కుటుంబ సభ్యులను కోల్పోయిన వారి కష్టకాలంలో అండగా నిలవడం ఆయన సేవా ప్రస్థానంలో ప్రత్యేకంగా నిలిచింది.

తాజ్ యాంబు తెలుగు సేవా సంఘం, SATA ద్వారా విస్తరించిన సేవలు

2019లో తాజ్ యాంబు తెలుగు సేవా సంఘంలో కోర్ మెంబర్‌గా చేరిన ఆయన, సంస్థ నిర్వహించే వివిధ సామాజిక సేవా కార్యక్రమాల్లో చురుకుగా పాల్గొన్నారు. అనంతరం SATA వ్యవస్థాపకుడు మల్లేశన్ సహకారంతో 2022లో SATA కోర్ టీమ్ సభ్యుడిగా బాధ్యతలు చేపట్టారు.

ఈ వేదిక ద్వారా సౌదీ అరేబియాలోని తెలుగు ప్రజలతో పాటు ఇతర భారతీయుల సంక్షేమానికి సంబంధించిన కార్యక్రమాల్లోనూ తనవంతు సహకారం అందించారు. భాష, ప్రాంతం, కులం, మతం వంటి భేదాలకు అతీతంగా అవసరంలో ఉన్నవారికి సహాయం చేయాలనే ఆశయంతో పనిచేశారు.

కరోనా మహమ్మారి సమయంలో యాంబు ప్రాంతంలో ఇబ్బందులు ఎదుర్కొన్న ప్రవాస భారతీయులకు నిత్యావసర సరుకులు అందించడం, ఆర్థికంగా వెనుకబడిన కుటుంబాలకు సహాయం చేయడం, ఒంటరిగా ఉన్నవారికి అండగా నిలవడం వంటి సేవా కార్యక్రమాల్లో పాల్గొన్నారు.

SATA ఆధ్వర్యంలో ఘనంగా ఆత్మీయ సత్కారం

జాన్ సుందర్ శీలా ఉద్యోగ విరమణ సందర్భంగా SATA వ్యవస్థాపకులు, కోర్ టీమ్ సభ్యులు ప్రత్యేకంగా సమావేశమై ఆయనకు ఘనంగా వీడ్కోలు పలికారు. ఈ కార్యక్రమంలో SATA వ్యవస్థాపకులు మల్లేశన్, కాశీనాథ్, రషీద్ ఖాన్, రవికిషోర్‌తో పాటు ఇతర కోర్ టీమ్ సభ్యులు పాల్గొన్నారు.

ఈ సందర్భంగా ఆయనతో కలిసి సాగించిన సేవా ప్రయాణాన్ని సభ్యులు గుర్తుచేసుకున్నారు. మూడు దశాబ్దాలకు పైగా ప్రవాస భారతీయుల సమస్యలపై స్పందిస్తూ, ఎన్నో కుటుంబాలకు కష్టకాలంలో అండగా నిలిచిన ఆయన సేవలు ప్రశంసనీయమని కొనియాడారు. ఉద్యోగ బాధ్యతలు నిర్వహిస్తూనే సమాజ సేవకు ఇంతటి ప్రాధాన్యత ఇవ్వడం అభినందనీయమని పేర్కొన్నారు.

SATA కుటుంబంలో ఆయనతో ఏర్పడిన ఆత్మీయ అనుబంధాలు, సేవా కార్యక్రమాల్లో అందించిన సహకారం ఎప్పటికీ గుర్తుండిపోతాయని తెలిపారు. ఆయన సేవలకు కృతజ్ఞతలు తెలియజేస్తూ భవిష్యత్తు జీవితం సుఖసంతోషాలు, ఆయురారోగ్యాలతో సాగాలని ఆకాంక్షించారు.

ఉద్యోగ విరమణే తప్ప సేవలకు విరామం కాదు!

దాదాపు నాలుగు దశాబ్దాల ప్రవాస జీవితం అనంతరం స్వదేశానికి తిరిగి వెళ్తున్న జాన్ సుందర్ శీలా, తన స్వస్థలం నర్సాపురంలో కుటుంబ సభ్యులతో కలిసి ప్రశాంతమైన జీవితాన్ని గడపాలని SATA వ్యవస్థాపకులు, కోర్ టీమ్ సభ్యులు ఆకాంక్షించారు.

ఉద్యోగ జీవితంలో సాధించిన విజయాలతో పాటు, మూడు దశాబ్దాలకు పైగా కొనసాగించిన సామాజిక సేవ ఆయన వ్యక్తిత్వానికి నిజమైన గుర్తింపుగా నిలుస్తుందని పేర్కొన్నారు. ఉద్యోగానికి విరమణ ఉన్నప్పటికీ మానవతా సేవకు, ఆత్మీయ అనుబంధాలకు విరామం ఉండదని, ఆయన సేవా స్ఫూర్తి భావితరాలకు ఆదర్శంగా నిలుస్తుందని SATA సభ్యులు అభిప్రాయపడ్డారు.

ఈ సందర్భంగా చడలవాడ జాన్ సుందర్ శీలాకి SATA కుటుంబం తరఫున హృదయపూర్వక అభినందనలు, శుభాకాంక్షలు తెలియజేశారు.