బహ్రెయిన్‌లో ‘సెలబ్రేట్ బహ్రెయిన్ 2026’..!!

- November 20, 2026 , by Maagulf
బహ్రెయిన్‌లో ‘సెలబ్రేట్ బహ్రెయిన్ 2026’..!!

మనామా: బహ్రెయిన్‌లో పర్యాటక రంగాన్ని ప్రోత్సహించడంతో పాటు స్థానికులు, సందర్శకులకు వినోదాన్ని అందించే లక్ష్యంతో ‘సెలబ్రేట్ బహ్రెయిన్ 2026’ వేడుకలకు ఏర్పాట్లు జరుగుతున్నాయి. ‘లైవ్ ఎవ్రీ మూమెంట్’ (Live Every Moment) అనే థీమ్‌తో బహ్రెయిన్ టూరిజం అండ్ ఎగ్జిబిషన్స్ అథారిటీ (BTEA) ఈ కార్యక్రమాలను నిర్వహించనుంది. ఐదోసారి నిర్వహిస్తున్న ఈ వేడుకల్లో భాగంగా దేశంలోని వివిధ ప్రాంతాలు, పర్యాటక కేంద్రాల్లో షాపింగ్ ఫెస్టివల్స్, సాంస్కృతిక కార్యక్రమాలు, సంగీత కచేరీలు, క్రీడా పోటీలు, బాణసంచా, డ్రోన్ ప్రదర్శనలు నిర్వహించనున్నారు. ప్రభుత్వ, ప్రైవేటు రంగ సంస్థల భాగస్వామ్యంతో ఈసారి మరిన్ని కార్యక్రమాలను అందుబాటులోకి తీసుకురానున్నారు.

షాపింగ్ ప్రియులకు ప్రత్యేక ఆకర్షణ

ఈ వేడుకల్లో భాగంగా రెండోసారి షాపింగ్ ఫెస్టివల్ నిర్వహించనున్నారు. ప్రముఖ మాల్స్, షాపింగ్ సెంటర్ల సహకారంతో ప్రత్యేక డిస్కౌంట్లు, ఆఫర్లు, బహుమతులు అందించనున్నారు. అలాగే ‘వెన్ వ బికమ్’ (Wen W Bkm) ఫెస్టివల్‌లో నాటక ప్రదర్శనలు, జానపద కళలు, పిల్లల ఆటలు, పోటీలు, బహుమతుల కార్యక్రమాలు నిర్వహిస్తారు.

బహ్రెయిన్ చరిత్ర, సంస్కృతికి ప్రాధాన్యం

ముహర్రఖ్ ప్రాంతంలోని చారిత్రక పెర్లింగ్ పాత్‌లో ‘ముహర్రఖ్ నైట్స్’ కార్యక్రమం నిర్వహించనున్నారు. బహ్రెయిన్ అథారిటీ ఫర్ కల్చర్ అండ్ యాంటిక్విటీస్ ఆధ్వర్యంలో జరిగే ఈ వేడుకల్లో స్థానిక చరిత్ర, కళలు, సంస్కృతిని ప్రతిబింబించే ప్రత్యేక కార్యక్రమాలు ఉంటాయి. మనామా సూక్‌లో BTEA ఆధ్వర్యంలో ‘హవా అల్ మనామా’ కార్యక్రమం నిర్వహించనున్నారు. రాజధాని మనామా గత చరిత్ర, సామాజిక జీవన విధానాన్ని గుర్తుచేసేలా ఇంటరాక్టివ్ కార్యక్రమాలు ఏర్పాటు చేస్తారు.

ఇంకా సమాచార మంత్రిత్వ శాఖ ఆధ్వర్యంలో జరిగే హెరిటేజ్ విలేజ్ ఫెస్టివల్‌లో సంప్రదాయ కళా ప్రదర్శనలు, స్థానిక మార్కెట్, హస్తకళల వస్తువులు ప్రత్యేక ఆకర్షణగా నిలవనున్నాయి. మున్సిపాలిటీల వ్యవహారాలు, వ్యవసాయ మంత్రిత్వ శాఖ నిర్వహించే బహ్రెయిన్ ఫార్మర్స్ మార్కెట్‌లో స్థానిక రైతులు పండించిన వ్యవసాయ ఉత్పత్తులను నేరుగా కొనుగోలు చేసే అవకాశం కల్పిస్తారు.

మ్యూజిక్ కాన్సర్టులు, గుర్రపు పందేలు

బెయోన్ అల్ దానా యాంఫీథియేటర్‌లో మ్యూజిక్ కాన్సర్టులు, ప్రత్యక్ష వినోద కార్యక్రమాలు నిర్వహించనున్నారు. వీటికి సంబంధించిన పూర్తి వివరాలను త్వరలో వెల్లడించనున్నారు. రషీద్ ఈక్వెస్ట్రియన్ అండ్ హార్స్ రేసింగ్ క్లబ్‌లో గుర్రపు పందేలు కూడా ఈ వేడుకల్లో భాగంగా జరగనున్నాయి.

ఫైర్ వర్క్స్, డ్రోన్ షోలతో ముగింపు

సెలబ్రేషన్స్ ముగింపు సందర్భంగా బహ్రెయిన్‌లోని పలు ప్రాంతాల్లో ఫైర్ వర్క్స్, డ్రోన్ ప్రదర్శనలు నిర్వహించనున్నారు. ఈ కార్యక్రమాలు స్థానికులతో పాటు పర్యాటకులను ఆకట్టుకునేలా ఏర్పాటు చేస్తున్నారు. ఈ వేడుకలకు సంబంధించిన తాజా సమాచారం కోసం BTEA అధికారిక సోషల్ మీడియా ఖాతా @tourismbahrain.ar, www.bahrain.com వెబ్‌సైట్, మొబైల్ యాప్‌ను సందర్శించాలని అధికారులు సూచించారు.

Click/tap here to subscribe to MAAGULF news alerts on Telegram

తాజా వార్తలు

- మరిన్ని వార్తలు

Copyrights 2015 | MaaGulf.com