భాగ్యనగరంపై వరుణుడు ప్రతాపం చూపిస్తున్నాడు. అల్పపీడనం ప్రభావంతో హైదరాబాద్‌లో గత రెండు రోజులుగా ఓ మోస్తరు నుంచి భారీ వర్షం కురుస్తోంది. అయితే గురువారం వరుణుడు తన ప్రతాపాన్ని చూపాడు. మధ్యాహ్నం 12 గంటల నుంచి ఒంటి గంట మధ్య జీహెచ్‌ఎంసీ పరిధిలో భారీవర్షం కురిసింది. గంట వ్యవధిలో 9.25 సెంటీమీటర్ల వర్షపాతం నమోదు కావడం విశేషం.గురువారం మధ్యాహ్నం నగరంలోని పలుచోట్ల ఆకాశం మేఘావృతమై ఒక్కసారిగా చీకట్లు కమ్ముకున్నాయి. అనంతరం చినుకులుగా ప్రారంభమైన వర్షం ఆకాశానికి చిల్లులు పడ్డాయా అన్నట్లు గంటపాటు కుండపోతగా కురుస్తూనే ఉంది. నగరంలో వినాయక నిమజ్జనం సాగుతున్న సమయంలో వరుణుడు ప్రతాపం చూపించడంతో భక్తులు ఇబ్బందులు పడ్డారు.